पिंकी बलहाराचा ऐतिहासिक पराक्रम

Asian Games 2026 आशियाई खेळ २०२६ मध्ये भारताच्या पिंकी बलहाराने एका अत्यंत प्राचीन खेळात पदक जिंकून इतिहास रचला आहे. या खेळाला तब्बल ३,५०० वर्षांची परंपरा आहे. विशेष म्हणजे या खेळात एकापेक्षा जास्त पदके जिंकण्याचा पराक्रम पिंकीने केला असून असा कारनामा करणारी ती पहिलीच भारतीय खेळाडू ठरली आहे. पिंकीने महिलांच्या ७८ किलो वजनी गटात दमदार कामगिरी करत भारतासाठी कांस्य पदकाची कमाई केली आहे.

 

आशियाई खेळांच्या इतिहासात कुराश या खेळात एकापेक्षा जास्त पदके जिंकणारी पिंकी बलहारा ही देशातील पहिलीच खेळाडू बनली आहे. यापूर्वी २०१८ मधील जकार्ता आशियाई स्पर्धेत तिने रौप्य पदक जिंकले होते. आता २०२६ च्या स्पर्धेत कांस्य पदक पटकावून तिने आपल्या पदकांची संख्या दोनवर नेली आहे. आशियाई खेळांच्या इतिहासातील कुराशमधील हे भारताचे एकूण तिसरे पदक ठरले आहे. पिंकीशिवाय २०१८ मध्ये मालाप्रभा जाधव हिने ५२ किलो वजनी गटात भारतासाठी कांस्य पदक जिंकले होते.

पिंकीने उपांत्यपूर्व (क्वार्टर फायनल) फेरीत आशियाई चॅम्पियनशिपची रौप्यपदक विजेती आणि दक्षिण कोरियाची कसलेली पैलवान लिम गराम हिचा ३-० असा धुव्वा उडवला. या मोठ्या विजयासह तिने ७८ किलो गटाच्या उपांत्य फेरीत प्रवेश केला आणि भारताचे पदक पक्के केले. मात्र, उपांत्य फेरीत पराभव स्वीकारावा लागल्याने तिला सुवर्ण किंवा रौप्य पदकापर्यंत पोहोचता आले नाही आणि कांस्य पदकावर समाधान मानावे लागले.

कुराश हा कुस्तीचाच एक अतिशय प्राचीन प्रकार मानला जातो, ज्याचा उगम मध्य आशियातील उझबेकिस्तानमध्ये ३,५०० वर्षांपूर्वी झाला होता. या खेळात मल्ल एका विशेष प्रकारचे जॅकेट घालतात आणि त्याला एकाच रंगाचा बेल्ट बांधून रिंगणात उतरतात. आशियाई खेळांमध्ये या प्राचीन खेळाचा समावेश सर्वात पहिल्यांदा २०१८ मधील जकार्ता आशियाई स्पर्धेत करण्यात आला होता.