रिझवानचा मोबाईल अन् चार आठवड्यांचा पेच!

batter-mohammad-rizwan पाकिस्तानचा स्टार फलंदाज मोहम्मद रिझवान याचा मोबाईल फोन जवळपास चार आठवड्यांपासून राष्ट्रीय सायबर गुन्हे अन्वेषण संस्थेच्या (एनसीसीआयए) ताब्यात आहे. फोन परत मिळावा यासाठी रिझवानने आता एनसीसीआयएला पत्र पाठवले आहे. यासोबतच त्याच्याविरोधात कोणत्या प्रकरणात तपास सुरू आहे, याची लेखी माहिती देण्याची तसेच पुढील चौकशीसाठी त्याने कधी आणि कोणत्या कारणासाठी हजर राहायचे आहे, हे स्पष्ट करण्याची मागणी त्याने केली आहे.

 

 

३१ ऑगस्ट रोजी इंग्लंडमध्ये लॉर्ड्सवर पाकिस्तान आणि इंग्लंड यांच्यात कसोटी सामना सुरू असताना रिझवानचा फोन जप्त करण्यात आला होता. रिझवानच्या म्हणण्यानुसार, त्यावेळी त्याला फोन तीन तासांत परत केला जाईल, असे सांगण्यात आले होते. मात्र, चार आठवडे उलटूनही फोन त्याला परत मिळालेला नाही. रिझवानने तपास यंत्रणेला फोनचा संकेतशब्दही दिला होता. तपासात सहकार्य करण्याच्या उद्देशाने त्याने फोन स्वेच्छेने दिल्याचा दावा त्याने केला आहे.

 

लाहोर उच्च न्यायालयाने रिझवानची याचिका फेटाळल्यानंतर या प्रकरणाला आणखी महत्त्व आले. एनसीसीआयएला या प्रकरणाचा तपास करण्याचा अधिकार नसल्याचा दावा करत रिझवानने न्यायालयात याचिका दाखल केली होती. न्यायालयाने ती फेटाळताना रिझवानने तपासात सहकार्य करावे, असे निर्देश दिले. त्याचवेळी तपासाच्या काळात रिझवानला कोणताही छळ किंवा अनावश्यक त्रास होणार नाही, याची काळजी घेण्याचे निर्देश एनसीसीआयएला देण्यात आले. जप्त करण्यात आलेल्या वस्तू, विशेषतः मोबाईल फोन परत मिळवण्यासाठी रिझवान संबंधित अधिकारक्षेत्र असलेल्या न्यायालयात दाद मागू शकतो, असेही न्यायालयाने नमूद केले.

 

रिझवानने आपल्या पत्रात म्हटले आहे की, न्यायालयाच्या या निर्देशांनंतरही एनसीसीआयएकडून त्याच्याशी कोणताही संपर्क साधण्यात आलेला नाही. तपास नेमक्या कोणत्या घटनेशी किंवा प्रकरणाशी संबंधित आहे, याची माहिती लेखी स्वरूपात देण्यात यावी, अशी मागणी त्याने केली आहे. तसेच चौकशीसाठी त्याला एनसीसीआयएसमोर नेमके कधी आणि कोणत्या उद्देशाने उपस्थित राहायचे आहे, याची निश्चित कालमर्यादा सांगावी, असेही त्याने पत्रात नमूद केले आहे.

 

ब्रिटनमध्ये असताना फोन तपास यंत्रणेकडे सुपूर्द करण्यास तो कायदेशीरदृष्ट्या बांधील नव्हता, असा रिझवानचा दावा आहे. मात्र, तपासाला सहकार्य करण्याच्या उद्देशाने त्याने फोन वापरण्याची परवानगी दिली होती. त्यावेळी तीन तासांच्या आत फोन परत करण्याचे आश्वासन देण्यात आले होते, असेही त्याने पत्रात म्हटले आहे.

 

फोन स्वेच्छेने तपास यंत्रणेकडे देणे आणि चौकशीशी संबंधित बाबींमध्ये सहकार्य करण्याची तयारी दाखवणे, यातून आपली भूमिका स्पष्ट होते, असे रिझवानने नमूद केले आहे. तपासात सहकार्य करण्याची आपली तयारी असल्याने तपास यंत्रणेनेही त्याच पद्धतीने कार्यवाही करावी, अशी अपेक्षा त्याने व्यक्त केली. मोबाईल फोन तातडीने परत करावा आणि आपल्याविरोधात सुरू असलेल्या तपासाचे स्वरूप स्पष्ट करावे, अशी मागणी रिझवानने एनसीसीआयएकडे केली आहे.