रेवंत रेड्डींच्या वक्तव्यावरून वाद
Total Views |
नवी दिल्ली,
revanth-reddy लंगणाचे मुख्यमंत्री ए. रेवंत रेड्डी यांनी प्रभू राम आणि भगवान शिव यांच्याबाबत केलेल्या वक्तव्यावरून राजकीय वाद निर्माण झाला आहे. सोमवारी दिल्लीत एका माध्यम संस्थेने आयोजित केलेल्या कार्यक्रमात बोलताना रेवंत रेड्डी यांनी, “शिव हे गरिबांचे देव आहेत, राम हे श्रीमंतांचे देव आहेत आणि भाजप हा श्रीमंतांचा पक्ष आहे,” असे म्हटले. त्यांच्या या वक्तव्यावर विश्व हिंदू परिषदेने तीव्र प्रतिक्रिया व्यक्त करत हिंदू देवतांची तुलना करणे हे हिंदू श्रद्धेवरील निंदनीय हल्ला असल्याचा आरोप केला.
रेवंत रेड्डी यांनी काँग्रेसच्या दक्षिण भारतातील राजकीय स्थितीचा उल्लेख करताना, उत्तर भारतात पक्षाला संघर्ष करावा लागत असल्याचे म्हटले. “भाजपने प्रभू राम चोरले आहेत, ज्यांची उत्तरेत पूजा केली जाते, तर दक्षिणेकडील राज्यांमध्ये शिवाची पूजा केली जाते,” असेही त्यांनी म्हटल्याचे सांगण्यात आले. या वक्तव्यावर प्रतिक्रिया देताना विश्व हिंदू परिषदेचे राष्ट्रीय प्रवक्ते विनोद बन्सल यांनी काँग्रेसवर हिंदू समाजात जात, पंथ, संप्रदाय, भाषा आणि प्रदेशाच्या आधारावर फूट पाडण्याचा प्रयत्न केल्याचा आरोप केला.
विनोद बन्सल यांनी म्हटले की, काँग्रेसचे नेते आता हिंदू देवतांनाही वेगवेगळ्या वर्गांमध्ये विभागण्याच्या पातळीवर गेले आहेत. रामाला श्रीमंतांचा देव आणि भोलेनाथाला गरिबांचा देव म्हणणे हा हिंदू देवतांमध्ये विभाजन निर्माण करण्याचा प्रयत्न असल्याचे त्यांनी म्हटले. हिंदू धर्माशी संबंधित मुद्द्यांवर काँग्रेस नेत्यांनी यापूर्वी केलेल्या वक्तव्यांचाही बन्सल यांनी संदर्भ देत काँग्रेसकडून माफीची मागणी केली.
बन्सल यांनी काँग्रेसच्या भूमिकेवर प्रश्न उपस्थित करत, हिंदू समाजाने या पक्षाकडून काय अपेक्षा ठेवावी, असा सवाल केला. तसेच रेवंत रेड्डी यांच्या कथित वक्तव्याचा उल्लेख करत त्यांनी काँग्रेसवर हिंदू धर्माविरोधात भूमिका घेतल्याचा आरोप केला. हिंदू धर्मावरील कथित वक्तव्यांबाबत काँग्रेसच्या नेतृत्वाने माफी मागणार की नाही, हे स्पष्ट करावे, अशी मागणीही त्यांनी केली.