अश्लील शिवीगाळ, बदनामीकारक मजकूर

manoj jarange patil मराठा आरक्षण आंदोलनाचे नेते मनोज जरांगे पाटील यांच्याभोवती आरोप-प्रत्यारोपांचे सत्र सुरू असतानाच आता त्यांच्या आंदोलनातील जुन्या सहकारी ललिता तारख यांनी पोलिसांत तक्रार दाखल केली आहे. सोशल मीडियावर आपल्याविरोधात अश्लील शिवीगाळ, बदनामीकारक मजकूर तसेच कृत्रिम बुद्धिमत्तेच्या (AI) माध्यमातून तयार केलेले फोटो आणि व्हिडीओ प्रसारित करून धमक्या दिल्या जात असल्याचा आरोप त्यांनी केला आहे. या प्रकरणी त्यांनी अंबड पोलिस ठाण्यात तक्रार दिल्याचे वृत्त आहे.

 

 

ललिता तारख यांनी 2023 पासून मनोज जरांगे यांच्या आंदोलनात सक्रिय सहभाग असल्याचे सांगितले आहे. मात्र, आता आपण जरांगे यांच्या भूमिकेवर प्रश्न उपस्थित करत असल्याने सोशल मीडियावर आपल्याला लक्ष्य केले जात असल्याचा त्यांचा दावा आहे. आपल्या कथित आर्थिक व्यवहारांची आणि मालमत्तेचीही चौकशी करण्यात यावी, अशी मागणी त्यांनी केली आहे. त्याचबरोबर आंदोलनाशी संबंधित सहकाऱ्यांच्या संपत्तीचीही तपासणी करण्याचे आवाहन त्यांनी केले आहे. या आरोपांबाबत अधिकृत तपासातूनच वस्तुस्थिती स्पष्ट होऊ शकते.

दरम्यान, मनोज जरांगे पाटील यांच्यावर अजय बारस्कर यांनीही आर्थिक व्यवहार आणि अवैध वाळू उत्खननाशी संबंधित गंभीर आरोप केले आहेत. बारस्कर यांनी जरांगे आणि त्यांच्या काही सहकाऱ्यांच्या कथित आर्थिक व्यवहारांची चौकशी करण्याची मागणी करत ईडीकडे तक्रार दाखल केल्याचे यापूर्वी वृत्त आले होते.

या आरोपांच्या पार्श्वभूमीवर जालना जिल्ह्यातील साष्टपिंपळगाव आणि डोमलगाव परिसरातील गोदावरी नदीपात्रातील सुमारे दोन हजार ब्रास अवैध वाळू उत्खननाच्या प्रकरणाचाही उल्लेख होत आहे. या प्रकरणात जरांगे यांच्या निकटवर्तीयांपैकी संजय कटारे यांच्यावर लावण्यात आलेला सुमारे 4 कोटी 90 लाख रुपयांचा दंड पुन्हा कायम करण्यात आल्याचे वृत्त आहे. यापूर्वी त्यांना दंडाच्या कारवाईतून वगळण्याचा तहसीलदारांचा आदेश उपविभागीय अधिकाऱ्यांनी रद्द केला.

मनोज जरांगे यांनी 29 ऑगस्टmanoj jarange patil  रोजी अंतरवाली सराटी येथे उपोषण सुरू केले होते. त्यानंतर ते मुंबईच्या दिशेने रवाना झाले आणि आझाद मैदानावर आंदोलन करण्याची घोषणा करण्यात आली होती. मात्र, उपोषणाच्या 20व्या दिवशी त्यांनी बीड जिल्ह्यातील पाटोदा येथे आंदोलन स्थगित करण्याची घोषणा केली. सरकारला तीन महिन्यांचा कालावधी देत पुढील आंदोलनाची भूमिका स्पष्ट केली. याच काळात त्यांच्या काही सहकाऱ्यांना आयकर विभागाकडून चौकशीसंदर्भात नोटिसा मिळाल्याचेही वृत्त समोर आले होते.

ललिता तारख यांनी सरकारने या संपूर्ण प्रकरणाची सखोल चौकशी करावी, अशी मागणी केली आहे. त्यांनी महाराष्ट्राचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्याकडेही चौकशीची विनंती केली आहे. दरम्यान, ललिता तारख यांच्या आरोपांवर मनोज जरांगे यांनी आंतरवाली सराटी गावाने मराठा समाजासाठी केलेल्या त्यागाचा उल्लेख केला असून, सध्या आपल्याविरोधात बदनामीचे प्रयत्न सुरू असल्याचा दावा केला आहे. त्यामुळे या आरोप-प्रत्यारोपांमध्ये आता पोलिस तक्रारीची भर पडली आहे.