भीषण हवाई हल्ला; ४९ जणांचा मृत्यू, ५८ जखमी

myanmar rakhine म्यानमारच्या पश्चिम रखाइन राज्यातील क्याउक्ताव टाउनशिपमध्ये बाजार परिसराला लक्ष्य करून करण्यात आलेल्या भीषण हवाई हल्ल्यात किमान ४९ जणांचा मृत्यू झाला असून ५८ जण जखमी झाले आहेत. जखमींपैकी २२ जणांची प्रकृती गंभीर असल्याचे सांगण्यात येत आहे. बाजारात खरेदी-विक्रीसाठी आलेले व्यापारी, ग्राहक तसेच रस्त्यावरून जाणारे नागरिक या हल्ल्याला बळी पडले. या घटनेनंतर परिसरात मोठी खळबळ उडाली आहे.

 

 

सोमवारी दुपारच्या सुमारास हा हल्ला झाला. क्याउक्ताव हे म्यानमारच्या दुसऱ्या क्रमांकाच्या मोठ्या शहर असलेल्या मांडलेपासून सुमारे ३४० किलोमीटर पश्चिमेला आहे. रखाइनमधील प्रभावशाली जातीय सशस्त्र संघटना असलेल्या ‘अराकान आर्मी’च्या नियंत्रणाखाली हा परिसर आहे. या संघटनेने मंगळवारी पहाटे जारी केलेल्या निवेदनात हल्ल्याची माहिती दिली. त्यांच्या म्हणण्यानुसार, एका लढाऊ विमानातून स्थानिक बाजाराजवळ दोन बॉम्ब टाकण्यात आले. या हल्ल्यात विक्रेते, खरेदीदार आणि पायी जाणारे नागरिक ठार झाले.

या हवाई हल्ल्याची स्वतंत्रपणे पडताळणी करणे शक्य झालेले नाही. मात्र, रखाइनमधील बचावकार्यात सहभागी असलेले वरिष्ठ अधिकारी वाई हुन आंग यांनी घटनास्थळी कार्यरत बचाव पथकांच्या हवाल्याने ‘द असोसिएटेड प्रेस’ला मृत आणि जखमींची संख्या सांगितली. त्यांच्या माहितीनुसार, संबंधित बाजार हा परिसरातील प्रमुख घाऊक केंद्र होता. त्यामुळे संपूर्ण रखाइन राज्यातून व्यापारी आणि खरेदीदार येथे येत असत. वाई हुन आंग यांनी हा हल्ला रखाइनमध्ये झालेल्या सर्वांत भीषण हवाई हल्ल्यांपैकी एक असल्याचे म्हटले आहे.

या घटनेनंतर ‘अराकान आर्मी’ने प्रत्युत्तर देण्याची धमकी दिली आहे. मोठ्या प्रमाणावर जीवितहानी घडवून आणणाऱ्या या हवाई हल्ल्यासाठी थेट जबाबदार असलेल्या व्यक्ती आणि संघटनांविरोधात लवकरच प्रभावी कारवाई केली जाईल, असा इशारा संघटनेने आपल्या निवेदनातून दिला आहे.

म्यानमारमध्ये गेल्या काही वर्षांपासून सुरू असलेल्या संघर्षाच्या पार्श्वभूमीवर ही घटना घडली आहे. १ फेब्रुवारी २०२१ रोजी लष्कराने आंग सान सू की यांच्या नेतृत्वाखालील निवडून आलेल्या सरकारकडून सत्ता हस्तगत केल्यानंतर देशात मोठ्या प्रमाणावर राजकीय अस्थिरता निर्माण झाली. लष्करी राजवटीविरोधात झालेल्या आंदोलनांवर सुरक्षा दलांनी कठोर कारवाई केली. त्यानंतर लष्कराच्या विरोधकांपैकी अनेकांनी सशस्त्र संघर्षाचा मार्ग स्वीकारला. परिणामी, म्यानमारच्या मोठ्या भागात लोकशाही समर्थक गट आणि जातीय सशस्त्र संघटनांचा लष्कराशी संघर्ष सुरू आहे. या संघर्षात विविध भागांमध्ये हवाई हल्ल्यांच्या घटनाही घडत आहेत. रखाइनमधील बाजाराजवळ झालेला ताजा हल्ला त्याच संघर्षातील आणखी एक गंभीर घटना ठरली आहे.