अपघातानंतर पोलिसांनाच धक्काबुक्की; तिघांवर गुन्हा

nagpur accident case अपघातग्रस्ताला रुग्णालयात पाठवून कर्तव्य बजावणाऱ्या पोलिस कर्मचाऱ्यांशी हुज्जत घालत त्यांना धक्काबुक्की, शिवीगाळ करून शासकीय कामात अडथळा आणल्याचा प्रकार एमआयडीसी परिसरात घडला. अपघातातील वाहनाच्या नुकसानभरपाईवरून हा वाद झाल्याचे पोलिसांनी सांगितले. या प्रकरणी एमआयडीसी पोलिसांनी तिघांविरुद्ध गुन्हा दाखल केला.

 

 

 

शनिवारी सायंकाळी वासुदेवनगर मेट्रो स्टेशनजवळ अपघात झाल्याची माहिती पोलिसांना डायल ११२ वरून मिळाली. त्यावेळी एमआयडीसी परिसरात बीट मार्शल म्हणून कर्तव्यावर असलेले पोलिस शिपाई अमित मनोहर खापेकर आणि त्यांचे सहकारी पोलिस शिपाई निलेश घटनास्थळी पोहोचले. घटनास्थळी अॅक्टिव्हा (एमएच-४०-डीएल-२७३८) आणि ट्रक (एमएच-४९-बीझेड-१९३९) यांच्यात धडक झाली. या अपघातात अॅक्टिव्हाचालक रुपेश राऊत जखमी झाला होता. खापेकर यांनी तातडीने रुग्णवाहिकेची व्यवस्था करून जखमी राऊत याला उपचारासाठी लता मंगेशकर रुग्णालयात रवाना केले. दरम्यान, ट्रकचालक दीपक मिश्रा, रा. रामेश्वरीनगर, एमआयडीसी, याने पोलिस शिपाई खापेकर यांच्याशी वाद घातल्याचे पोलिसांचे म्हणणे आहे. अपघातातील नुकसानभरपाई मिळवून देण्याची मागणी त्याने केल्याचे सांगण्यात आले. जखमी दुचाकीस्वाराकडून नुकसानभरपाई वसूल करण्याचा आपला विचार असल्याचे त्याने पोलिसांना सांगितले. मात्र, पोलिस हे खासगी नुकसानभरपाईचा वाद सोडविणारे अधिकारी नसल्याचे खापेकर यांनी स्पष्ट केल्यावर वाद अधिक चिघळल्याचा आरोप आहे. त्यानंतर मिश्रा याने कथितरित्या आपल्या वडिलांना आणि भावाला घटनास्थळी बोलावून घेतले.

 

 

तिघांनी मिळून खापेकर आणि त्यांच्या सहकारी पोलिस कर्मचाऱ्याला धक्काबुक्की व मारहाण केली, शिवीगाळ केली आणि शासकीय कर्तव्य बजावण्यास अडथळा आणला, असा आरोप तक्रारीत करण्यात आला आहे. एवढ्यावरच न थांबता तिघांनी पोलिस कर्मचाऱ्यांचा पोलिस ठाण्यापर्यंत पाठलाग केल्याचेही तक्रारीत नमूद आहे. आरोपींनी पोलिस कर्मचाऱ्यांना निलंबित करवून देण्याची धमकी दिली. वरिष्ठ अधिकाऱ्यांशी तसेच राजकीय व्यक्तींशी आपले संबंध असल्याचे सांगून दबाव निर्माण करण्याचा प्रयत्न केल्याचाही आरोप आहे.

 

 

 

 

या घटनेनंतर पोलिस शिपाई अमित खापेकर यांनी दिलेल्या तक्रारीवरून एमआयडीसी पोलिसांनी तिघांविरुद्ध भारतीय न्याय संहितेतील संबंधित कलमांनुसार गुन्हा दाखल केला आहे. पोलिस कर्मचाऱ्यांवर हल्ला करून त्यांच्या शासकीय कामात अडथळा आणल्याच्या आरोपांची चौकशी सुरू असून घटनेमागील नेमका घटनाक्रम आणि आरोपींची भूमिका तपासली जात आहे. अपघाताच्या ठिकाणी जखमीला वैद्यकीय मदत मिळवून देणे आणि कायदा-सुव्यवस्था राखणे हे पोलिसांचे कर्तव्य असताना, खासगी नुकसानभरपाईच्या मागणीवरून पोलिसांशीच हुज्जत घालण्याचा प्रकार घडल्याने या घटनेची पोलिस वर्तुळातही गंभीर दखल घेतली जात आहे.