नागपुरात फुलणार फुलांचा उत्सव!
Total Views |
नागपूर,
flower festival नागपूर गार्डन क्लबतर्फे स्व. कुसुमताई वानखेडे यांच्या स्मृतिप्रीत्यर्थ १२४ व्या मान्सून पुष्प प्रदर्शनाचे आणि ५१ व्या इनडोअर प्लांट्स प्रदर्शनाचे आयोजन करण्यात आले आहे. फुले, विविध प्रकारच्या वनस्पती, बागकाम आणि उद्यानविद्येतील कलागुणांना व्यासपीठ देणारा हा वार्षिक सोहळा यंदाही आकर्षणाचा केंद्रबिंदू ठरणार आहे.
हे प्रदर्शन रविवार, ६ सप्टेंबर २०२६ रोजी सकाळी ११ ते रात्री ८ वाजेपर्यंत श्रीमती कुसुमताई वानखेडे हॉल, नागपूर येथे आयोजित करण्यात येणार आहे. प्रदर्शनात विविध प्रकारच्या फुलांची आणि वनस्पतींची आकर्षक मांडणी करण्यात येणार असून, बागकामप्रेमी, वनस्पतीप्रेमी तसेच नागरिकांना उद्यानविद्येतील विविध प्रकार जाणून घेण्यासोबतच या रंगीबेरंगी प्रदर्शनाचा आनंद घेता येणार आहे.
प्रदर्शनात इनडोअर आणि हाऊस प्लांट्स, कट रोझेस, बोन्साय, पुष्परचना व सजावट, भाजीपाला बास्केट तसेच कॅक्टस आणि सक्युलंट्स अशा विविध विभागांचा समावेश असेल. या विभागांमध्ये सहभागींकडून विविध प्रकारच्या आकर्षक प्रवेशिका सादर केल्या जाणार आहेत.
विद्यार्थ्यांमध्ये निसर्ग, फुले आणि बागकामाची आवड निर्माण करण्याच्या उद्देशाने नागपूर गार्डन क्लबतर्फे शाळांसाठी विशेष चित्रकला आणि ‘फ्लोरल कार्पेट’ अर्थात फुलांची रांगोळी व सजावट स्पर्धेचेही आयोजन करण्यात येणार आहे. या माध्यमातून विद्यार्थ्यांना आपल्या सर्जनशीलतेतून फुले, वनस्पती आणि नैसर्गिक पर्यावरणाविषयीचे प्रेम व्यक्त करण्याची संधी मिळणार आहे.
१२४ वे मान्सून पुष्प प्रदर्शन आणि ५१ वे इनडोअर प्लांट्स प्रदर्शन हे बागकामप्रेमी, कुटुंबे, विद्यार्थी आणि निसर्गप्रेमींसाठी एक आकर्षक अनुभव ठरणार आहे. या प्रदर्शनाला भेट देऊन विविध फुले व वनस्पतींच्या सुंदर मांडणीचा आनंद घ्यावा, असे आवाहन नागपूर गार्डन क्लबतर्फे करण्यात आले आहे.
दिनांक : रविवार, ६ सप्टेंबर २०२६
वेळ : सकाळी ११ ते रात्री ८
स्थळ : श्रीमती कुसुमताई वानखेडे हॉल, नागपूर
सौजन्य: नितीन दाते, संपर्क मित्र