लग्नाच्या अवघ्या 5 महिन्यांत रॅपर बादशाह आणि अभिनेत्री ईशा रिखीचा घटस्फोट

badshah and isha rikhi प्रसिद्ध भारतीय रॅपर बादशहा आणि पंजाबी अभिनेत्री ईशा रिखी यांनी लग्नाच्या अवघ्या पाच महिन्यांत विभक्त होण्याचा निर्णय घेतला आहे. दोघांनीही ३१ ऑगस्ट रोजी त्यांच्या अधिकृत इन्स्टाग्राम हँडलवरून एकसारखी पोस्ट शेअर करत परस्पर संमतीने विभक्त होत असल्याची माहिती दिली. त्यांच्या या निर्णयामुळे चाहत्यांना मोठा धक्का बसला असून, गेल्या काही दिवसांपासून त्यांच्या नात्याबाबत सुरू असलेल्या चर्चांनाही आता पूर्णविराम मिळाला आहे.

 

 

बादशहा आणि ईशा रिखी यांनी संयुक्त स्वरूपाची पोस्ट शेअर करत आपल्या नात्याबाबत स्पष्ट भूमिका मांडली. “आम्ही दोघांनी वेगळं होण्याचं आणि आमच्या वेगवेगळ्या मार्गावर पुढे जाण्याचा ठरवलं आहे. आम्ही हा निर्णय परस्पर संमतीने घेतला आहे. या काळात प्रत्येकाने आमच्या प्रायव्हसीचा आदर करावा, अशी विनंती आहे. याबाबत आमचं हे एकमेव स्टेटमेंट आहे. आमच्या नात्याबाबत कोणत्याही शक्यता किंवा अंदाज बांधले जाऊ नयेत, अशी विनंती,” असे त्यांनी या पोस्टमध्ये म्हटले आहे.

मिळालेल्या माहितीनुसार, बादशहा आणि ईशा रिखी यांनी याच वर्षी मार्चमध्ये मोजके नातेवाईक आणि जवळचे मित्र यांच्या उपस्थितीत विवाह केला होता. त्यांच्या लग्नाची माहिती ईशाच्या आईने लग्नातील काही फोटो आणि व्हिडिओ सोशल मीडियावर शेअर केल्यानंतर समोर आली होती. या छायाचित्रांमध्ये बादशहा ब्राउन रंगाचा कुर्ता आणि गोल्डन साफा परिधान केलेला दिसत होता, तर ईशा लाल रंगाच्या पारंपरिक वधूच्या पोशाखात दिसली होती.

विवाहानंतर काही काळ बादशहा आणि ईशा यांनी आपल्या नात्याबाबत मौन बाळगले होते. मात्र, त्यानंतर ईशाने एका इन्स्टाग्राम लाईव्हदरम्यान चाहत्यांनी विचारलेल्या प्रश्नांना उत्तर देताना आपल्या लग्नाची माहिती दिली होती. यावेळी तिने बादशहाचा उल्लेख आपला पती असा केला होता. तसेच लग्नाचा पहिला अधिकृत फोटोही तिने चाहत्यांसोबत शेअर केला होता.

दरम्यान, गेल्या काही दिवसांपासून दोघांच्या नात्याबाबत विविध चर्चा सुरू होत्या. बादशहा आणि ईशा रिखी यांनी इन्स्टाग्रामवर एकमेकांना अनफॉलो केल्याचे समोर आल्यानंतर त्यांच्या नात्याबद्दल सोशल मीडियावर वेगवेगळे अंदाज व्यक्त केले जात होते. या चर्चांना अखेर दोघांनीही संयुक्तपणे विभक्त होण्याची माहिती देत पूर्णविराम दिला आहे. परस्पर संमतीने घेतलेल्या या निर्णयानंतर चाहत्यांनी त्यांच्या खासगी आयुष्याचा आदर करावा, अशीच विनंती दोघांनी आपल्या अधिकृत निवेदनातून केली आहे.