ॲक्शन प्लॅन 8 कोटी तरुणांना रोजगाराची अपेक्षा

jobs expected देशभरातील नागरिकांना वाहतुकीचा नवा पर्याय उपलब्ध करून देण्यासाठी केंद्र सरकारने बाइक टॅक्सीला चालना देण्याचा निर्णय घेतला असून, यासाठी केंद्रीय रस्ते वाहतूक आणि महामार्ग मंत्री नितीन गडकरी यांनी मोठा ॲक्शन प्लॅन मांडला आहे. देशातील सर्व राज्य सरकारांनी टू-व्हीलर आणि बाइक टॅक्सीला परवाने जारी करावेत, असे आवाहन गडकरी यांनी केले आहे. बाइक टॅक्सीच्या माध्यमातून रोजगाराच्या मोठ्या संधी निर्माण होण्यासोबतच नागरिकांना नवी वाहतूक सेवा उपलब्ध होईल, असा दावा त्यांनी केला. या क्षेत्रातून तब्बल 8 कोटी तरुणांना रोजगार मिळू शकतो, असेही गडकरी यांनी स्पष्ट केले.

 

 

‘सुरक्षा’ या कार्यक्रमात बोलताना गडकरी यांनी बाइक टॅक्सीच्या मुद्द्यावर सविस्तर भाष्य केले. केंद्र सरकारने खासगी टू-व्हीलर, स्कूटर आणि बाइकच्या माध्यमातून नागरिकांना वाहतूक सेवा देण्यास परवानगी दिली आहे. मात्र, काही राज्यांमध्ये अद्याप बाइक टॅक्सीसाठी आवश्यक परवाने जारी करण्यात आलेले नाहीत. त्यामुळे देशातील सर्व राज्य सरकारांनी टू-व्हीलर आणि बाइक टॅक्सीसाठी परवाने द्यावेत, अशी विनंती त्यांनी केली.

बाइक टॅक्सीला परवानगी मिळाल्यास केवळ शहरी भागातील वाहतूक व्यवस्था सुलभ होणार नाही, तर ग्रामीण भागातील तरुणांनाही रोजगाराच्या संधी उपलब्ध होतील, असा गडकरी यांचा दावा आहे. देशातील सर्व राज्यांनी बाइक टॅक्सीला परवानगी दिल्यास नागरिकांना नवीन वाहतूक सुविधा मिळेल आणि त्यासोबत मोठ्या प्रमाणावर रोजगारनिर्मितीलाही चालना मिळेल, असे त्यांनी नमूद केले.

दरम्यान, ‘सुरक्षा’ कार्यक्रमाच्या माध्यमातून रस्ते सुरक्षेबरोबरच महामार्ग आणि विविध बांधकाम क्षेत्रात काम करणाऱ्या कामगारांच्या आरोग्यावरही केंद्र सरकार विशेष लक्ष देणार असल्याचे गडकरी यांनी स्पष्ट केले. देशातील महामार्ग आणि द्रुतगती मार्गांच्या बांधकामात तसेच खाणींमध्ये काम करणाऱ्या कामगारांची मोफत वैद्यकीय तपासणी करण्यात येणार आहे. त्यांच्यासाठी समुपदेशनाची सुविधाही उपलब्ध करून दिली जाणार असून, ही सुविधा थेट कामाच्या ठिकाणी देण्याची योजना आहे.

या उपक्रमाची सुरुवात नागपूरच्या कामठी आणि चंद्रपूर परिसरातील खाणकाम करणाऱ्या सुमारे 10 हजार कामगारांपासून केली जाणार असल्याचे गडकरी यांनी सांगितले. कामगारांच्या आरोग्याची काळजी घेण्यासोबतच वाहनचालकांच्या आरोग्यालाही केंद्र सरकार महत्त्व देत असल्याचे त्यांनी स्पष्ट केले. चालक निरोगी राहिल्यासच रस्ते सुरक्षा अधिक प्रभावीपणे कायम ठेवता येईल. विशेषतः चालकांच्या डोळ्यांच्या आरोग्याचा प्रश्न महत्त्वाचा असल्याचे त्यांनी अधोरेखित केले.वाहतूक नियमांचे उल्लंघन करणाऱ्या वाहनचालकांवर नियंत्रण ठेवण्यासाठी नवी ‘नकारात्मक पॉइंट सिस्टिम’ आणण्याची तयारीही केंद्र सरकार करत आहे. नियमांचे उल्लंघन केल्यास संबंधित चालकाच्या पॉइंटमध्ये कपात केली जाईल. एखाद्या चालकाने ठरवून दिलेली मर्यादा ओलांडल्यास त्याचा वाहन परवाना रद्द करण्याचीही तरतूद केली जाणार आहे. वारंवार वाहतूक नियम मोडणाऱ्या चालकांना जबाबदारीने वाहन चालवण्यास प्रवृत्त करणे, हा या व्यवस्थेचा उद्देश असल्याचे गडकरी यांनी स्पष्ट केले.बाइक टॅक्सीला देशभर परवानगी, कामगारांसाठी मोफत आरोग्य तपासणी आणि नियमभंग करणाऱ्या चालकांवर पॉइंट सिस्टिमच्या माध्यमातून कारवाई, अशा तीन महत्त्वाच्या मुद्द्यांवर गडकरी यांनी या कार्यक्रमात भूमिका स्पष्ट केली. त्यामुळे रस्ते सुरक्षा आणि रोजगारनिर्मितीच्या दृष्टीने त्यांच्या या घोषणा महत्त्वाच्या मानल्या जात आहेत.