ज्येष्ठ संगीतकार गौरांग व्यास यांचे निधन!

Gaurang Vyas passes away गुजराती संगीतविश्वातील प्रसिद्ध संगीतकार, संगीत संयोजक आणि गायक गौरांग व्यास यांचे वयाच्या ८७व्या वर्षी निधन झाले. त्यांच्या निधनावर पंतप्रधान नरेंद्र मोदी यांनी दुःख व्यक्त करत श्रद्धांजली वाहिली. गौरांग व्यास हे ज्येष्ठ संगीतकार अविनाश व्यास यांचे पुत्र होते. वडिलांची संगीत परंपरा पुढे नेत त्यांनी गुजराती चित्रपट आणि लोकसंगीत क्षेत्रात स्वतःची वेगळी ओळख निर्माण केली होती.गौरांग व्यास यांच्या निधनानंतर पंतप्रधान मोदींनी सोशल मीडियावर त्यांच्यासोबतचा फोटो शेअर करत त्यांच्या योगदानाचे स्मरण केले. गुजराती संगीतक्षेत्राने एक प्रतिभावान कलाकार गमावल्याचे मोदींनी म्हटले. व्यास यांच्या कुटुंबीय आणि असंख्य चाहत्यांप्रती त्यांनी संवेदना व्यक्त करत त्यांच्या आत्म्यास शांती लाभो, अशी प्रार्थना केली.

 

 

 

 

गौरांग व्यास यांनी ‘जसल तोरल’ या चित्रपटातून वडिलांचे सहाय्यक म्हणून कारकिर्दीला सुरुवात केली. त्यानंतर ‘लाखो फुलानी’मधून स्वतंत्र संगीत दिग्दर्शक म्हणून काम केले. आपल्या दीर्घ कारकिर्दीत त्यांनी १०० हून अधिक चित्रपटांना संगीत दिले. ‘भवनी भवाई’, ‘मनियारो’, ‘नसीबानी बलिहारी’, ‘पार्की थापन’, ‘लिलुडी धरती’ आणि ‘मैयारामन मांडू नथी लगटू’ या चित्रपटांचा त्यात समावेश आहे. त्यांनी लता मंगेशकर, आशा भोसले, किशोर कुमार, मन्ना डे, महेंद्र कपूर, सुमन कल्याणपूर, भूपिंदर सिंग आणि प्रफुल्ल दवे यांसारख्या दिग्गज गायकांसोबतही काम केले.