उद्या गोकुळाष्टमी; मध्यरात्रीच्या पूजेचा खास मुहूर्त जाणून घ्या!

gokulashtami भगवान श्रीकृष्णाच्या जन्मोत्सवाचा पवित्र सण असलेली गोकुळाष्टमी यंदा शुक्रवार, ४ सप्टेंबर २०२६ रोजी साजरी होणार आहे. भाद्रपद महिन्यातील कृष्ण पक्षाच्या अष्टमी तिथीला जन्माष्टमी साजरी केली जाते. धार्मिक मान्यतेनुसार याच दिवशी मथुरा नगरीत देवकीच्या आठव्या पुत्राच्या रूपाने भगवान श्रीकृष्णाचा जन्म झाला होता. त्यामुळे देशभरातील कृष्णभक्तांसाठी या दिवसाला विशेष धार्मिक महत्त्व आहे. या दिवशी अनेक भक्त उपवास करून मध्यरात्री श्रीकृष्ण जन्माची पूजा करतात. वैदिक पंचांगानुसार अष्टमी तिथी ४ सप्टेंबर रोजी पहाटे २ वाजून २५ मिनिटांनी सुरू होऊन ५ सप्टेंबर रोजी मध्यरात्री १२ वाजून १३ मिनिटांपर्यंत राहणार आहे. रोहिणी नक्षत्र ४ सप्टेंबर रोजी मध्यरात्री १२ वाजून २९ मिनिटांनी सुरू होऊन रात्री ११ वाजून ४ मिनिटांपर्यंत असेल.

 

 

श्रीकृष्णाचा जन्म मध्यरात्री झाल्याची धार्मिक मान्यता असल्याने जन्माष्टमीच्या दिवशी मध्यरात्रीची पूजा अत्यंत महत्त्वाची मानली जाते. यंदा श्रीकृष्ण जन्मपूजेसाठी ४ सप्टेंबर रोजी रात्री ११ वाजून ५७ मिनिटांपासून मध्यरात्री १२ वाजून ४३ मिनिटांपर्यंतचा काळ शुभ मानण्यात आला आहे. या वेळेत बाळकृष्णाचा अभिषेक, जन्मपूजा आणि आरती करता येणार आहे. जन्माष्टमीचा उपवास सोडण्यासाठी ५ सप्टेंबर रोजी सकाळी ६ वाजून १ मिनिटांनंतरची वेळ देण्यात आली आहे. धार्मिक परंपरेनुसार या दिवशी भक्त दिवसभर उपवास ठेवून रात्रीच्या जन्मपूजेची तयारी करतात आणि श्रीकृष्णाच्या जन्मानंतर उपवास सोडतात. काही भक्त मात्र दुसऱ्या दिवशी सूर्योदयानंतर उपवास सोडण्याची परंपरा पाळतात.

 

जन्माष्टमीच्या पूजेसाठी रात्रीच्या वेळी बाळ गोपाळाची विशेष पूजा केली जाते. मध्यरात्रीपूर्वी पूजेची तयारी करून नैवेद्य तयार केला जातो. श्रीकृष्ण जन्माच्या वेळी बाळ गोपाळाला पंचामृताने स्नान घालून नवीन वस्त्रे परिधान केली जातात. त्यानंतर मोरपिसे, बासरी आणि तुळशीची पाने अर्पण केली जातात. बाळकृष्णाला सजवलेल्या झोपाळ्यात ठेवून झोका देण्याचीही परंपरा आहे. माखन-मिश्री, पंजिरी आणि खीर यांचा नैवेद्य दाखवून आरती केली जाते. अशा प्रकारे मध्यरात्री श्रीकृष्ण जन्माचा सोहळा भक्तिभावाने साजरा केला जातो.