आगरकरांच्या जागी प्रज्ञानवर बीसीसीआयचे 'ओझे'

BCCI selects Pragyan Ojha टीम इंडियाच्या मुख्य निवडकर्ता पदावर आगामी काळात बदल होण्याची शक्यता वर्तवली जात आहे. अजित आगरकर यांच्या जागी प्रज्ञान ओझा यांची अंतरिम मुख्य निवडकर्ता म्हणून नियुक्ती करण्याचा विचार भारतीय क्रिकेट नियामक मंडळाकडून केला जात असल्याचे वृत्त आहे. पीटीआयने यासंदर्भात माहिती दिली आहे. सध्याच्या निवड समितीतील सदस्यांमध्ये प्रज्ञान ओझा यांच्याकडे सर्वाधिक कसोटी सामन्यांचा अनुभव असल्याने त्यांच्याकडे मुख्य निवड समितीची जबाबदारी सोपवली जाऊ शकते. त्यानंतर त्यांची पूर्णवेळ मुख्य निवडकर्ता म्हणूनही नियुक्ती होण्याची शक्यता व्यक्त करण्यात आली आहे. न्यूझीलंड दौऱ्यासाठी भारतीय संघांची निवड करण्याच्या पार्श्वभूमीवर नुकतीच मुख्य प्रशिक्षक गौतम गंभीर आणि निवड समितीतील काही सदस्यांची बैठक झाल्याचे समजते. या बैठकीच्या फोटोमध्ये प्रज्ञान ओझा, आरपी सिंग, अजय रात्रा आणि शिवसुंदर दास उपस्थित असल्याचे दिसले. मात्र, या बैठकीत अजित आगरकर दिसले नाहीत. त्यामुळे त्यांच्या अनुपस्थितीचीही चर्चा सुरू झाली आहे.

 

 

 

 

 

प्रज्ञान ओझा हे भारताचे माजी डावखुरे फिरकीपटू आहेत. त्यांनी 2008 ते 2013 या कालावधीत भारतीय संघाचे प्रतिनिधित्व केले. भारतासाठी त्यांनी 24 कसोटी, 18 एकदिवसीय आणि 6 टी-20 आंतरराष्ट्रीय सामने खेळले आहेत. कसोटी क्रिकेटमध्ये ओझा यांनी 24 सामन्यांत 113 विकेट्स घेतल्या आहेत. एकदिवसीय क्रिकेटमध्ये त्यांच्या नावावर 21 विकेट्स आहेत, तर टी-20 आंतरराष्ट्रीय सामन्यांमध्ये त्यांनी 10 विकेट्स घेतल्या आहेत. क्रिकेटमधून निवृत्ती घेतल्यानंतर प्रज्ञान ओझा क्रिकेट प्रशासन आणि निवड प्रक्रियेशी जोडले गेले. सध्या ते भारतीय निवड समितीचे सदस्य आहेत. त्यामुळे मुख्य निवडकर्ता पदासाठी त्यांचे नाव चर्चेत आले आहे. सध्याच्या समितीमध्ये सर्वाधिक कसोटी अनुभव असलेल्या सदस्यांपैकी ते एक आहेत.

 

 

 

प्रज्ञान ओझा आणि रोहित शर्मा यांची मैत्रीही क्रिकेटविश्वात परिचित आहे. दोघांनी मुंबई इंडियन्सकडून एकत्र क्रिकेट खेळले आहे. त्यामुळे ओझा यांचे नाव मुख्य निवडकर्ता पदासाठी चर्चेत आल्यानंतर रोहित शर्मासोबतच्या त्यांच्या जुन्या संबंधांचाही उल्लेख केला जात आहे.भारताचा न्यूझीलंड दौरा 22 ऑक्टोबरपासून सुरू होणार आहे. या दौऱ्यात भारत टी-20, एकदिवसीय आणि कसोटी मालिका खेळणार आहे. 2027 च्या एकदिवसीय विश्वचषकाच्या तयारीच्या दृष्टीने हा कालावधी महत्त्वाचा मानला जात आहे. नव्या खेळाडूंना संधी देण्यासोबतच अनुभवी क्रिकेटपटूंच्या भूमिकेबाबत निर्णय घेण्याचे आव्हान निवड समितीसमोर असेल. त्यामुळे न्यूझीलंड दौऱ्यासाठी संघ निवडताना मुख्य निवडकर्ता पदावरील संभाव्य बदलाकडे क्रिकेट चाहत्यांचे लक्ष लागले आहे.