नीरू कायनानच्या अचूक निशाण्याने भारताला नववे सुवर्ण

neeru-kaynan ३० सप्टेंबर हा दिवस भारतासाठी २०२६च्या आशियाई क्रीडा स्पर्धेत पदकांच्या दृष्टीने महत्त्वाचा ठरत आहे. तिरंदाजीत दोन सुवर्णपदकांची भर पडल्यानंतर आता नेमबाजीतही भारताने सुवर्णपदक पटकावले आहे. नीरू धांडा आणि कायनान चेनाई या भारतीय जोडीने ट्रॅप मिश्र सांघिक प्रकारात अंतिम फेरीत दमदार कामगिरी करत सुवर्णपदकावर नाव कोरले. हे भारताचे स्पर्धेतील नववे सुवर्णपदक ठरले असून, देशाच्या एकूण पदकांची संख्या ५७ वर पोहोचली आहे.

 

 

अंतिम फेरीपूर्वी भारतीय जोडी चौथ्या क्रमांकावर होती. सुरुवातीच्या १० नेमांमध्ये त्यांना अपेक्षित कामगिरी करता आली नाही. मात्र, त्यानंतर नीरू धांडा आणि कायनान चेनाई यांनी जोरदार पुनरागमन केले. दोघांनी मिळून ४० पैकी ३४ नेम अचूक साधत सुवर्णपदक निश्चित केले. विशेष म्हणजे, या कामगिरीसह भारतीय जोडीने ट्रॅप मिश्र सांघिक प्रकारातील नवा आशियाई विक्रमही आपल्या नावावर केला. यापूर्वी कतारच्या जोडीने ४० पैकी ३० नेम अचूक साधण्याचा विक्रम केला होता.

 

अंतिम फेरीत भारताने ३४ गुणांसह पहिले स्थान मिळवले. कतारच्या मोहम्मद अल-रुमैही आणि रे बेसिल यांनी ३२ गुणांसह रौप्यपदक मिळवले, तर चीनच्या ची यिंग आणि सन युनॉन्ग यांनी तीन मालिकांमध्ये २३ गुण नोंदवत कांस्यपदक पटकावले. इराणला १२ गुणांसह चौथ्या स्थानावर समाधान मानावे लागले. नीरू धांडाचे आशियाई क्रीडा स्पर्धेतील हे दुसरे आणि एकूण तिसरे सुवर्णपदक आहे.

 

या सुवर्णपदकानंतर भारताच्या खात्यात आता ९ सुवर्ण, २१ रौप्य आणि २७ कांस्य अशी एकूण ५७ पदके जमा झाली आहेत. त्यामुळे भारत पदकतालिकेत आठव्या स्थानावर पोहोचला आहे. स्पर्धेतील भारताची पदकांची मोहीम अद्याप सुरू असून, तिरंदाजीत भारतीय पुरुष संघाने कंपाऊंड प्रकारातील सुवर्णपदकाच्या सामन्यातही स्थान निश्चित केले आहे.