इतर मुलं उतरली अन् चिमुकली बसमध्ये एकटी राहिली!

नवी मुंबईतील कामोठे परिसरात ३ वर्षांच्या मुलीवर स्कूल बस चालकाने लैंगिक अत्याचार केल्याची धक्कादायक घटना समोर आली आहे. शाळा सुटल्यानंतर इतर विद्यार्थी आपापल्या ठिकाणी उतरले आणि मुलगी बसमध्ये एकटी राहिली. याच परिस्थितीचा गैरफायदा घेत चालकाने तिच्यावर अत्याचार केल्याचा आरोप आहे. मुलीच्या कुटुंबीयांनी पोलिसांकडे तक्रार केल्यानंतर आरोपी चालकाला अटक करण्यात आली.ही घटना मुलीने घरी आल्यानंतर केलेल्या पोटदुखीच्या तक्रारीमुळे उघड झाली. तिने आजीला बसमध्ये चालकाने तिच्यासोबत गैरप्रकार केल्याचे सांगितले. त्यानंतर आजीने विलंब न करता शाळा व्यवस्थापनाशी संपर्क साधला आणि पुढे पोलिसांकडे तक्रार करण्यात आली. मुलीची वैद्यकीय तपासणी करण्यात आली असता लैंगिक अत्याचार झाल्याची पुष्टी झाली. त्यानंतर पोलिसांनी आरोपीविरोधात गुन्हा दाखल केला.

 

 

 

पोलिसांनी आरोपी बस चालकाला लैंगिक अत्याचाराच्या आरोपाखाली अटक करून गुरुवारी पनवेल न्यायालयात हजर केले. न्यायालयाने आरोपीला शनिवारपर्यंत पोलीस कोठडी सुनावली आहे. या प्रकरणाच्या तपासादरम्यान शाळा व्यवस्थापनातील कर्मचाऱ्यांचेही जबाब नोंदवले जाणार असल्याचे पोलिसांनी सांगितले.पोलिसांच्या माहितीनुसार, ही घटना बुधवारी दुपारी सुमारे साडेबारा वाजता घडली. ही ३ वर्षांची मुलगी इतर विद्यार्थ्यांसोबत दररोज खासगी बसने बालवाडी आणि प्राथमिक शाळेत ये-जा करत होती. बुधवारी चालक विद्यार्थ्यांना त्यांच्या घरी सोडण्यासाठी कामोठे परिसरात बस घेऊन गेला. ठरलेल्या ठिकाणी इतर सर्व मुले उतरली. त्यानंतर मुलगी बसमध्ये चालकासोबत एकटी राहिली आणि त्याने या परिस्थितीचा फायदा घेत तिच्यावर अत्याचार केल्याचा आरोप आहे. पोलिसांनी आरोपीविरुद्ध भारतीय दंड संहितेतील संबंधित कलमांनुसार, त्यामध्ये १२ वर्षांखालील मुलीवरील बलात्काराशी संबंधित कलमांचा समावेश आहे, तसेच लैंगिक गुन्ह्यांपासून मुलांचे संरक्षण अर्थात पॉक्सो कायद्यांतर्गत गुन्हा दाखल केला आहे. या प्रकरणात पुढील तपास सुरू असून, शाळा व्यवस्थापनाच्या भूमिकेचीही चौकशी केली जाणार आहे.