‘मिर्झापूर’चा शेवट की नव्या खेळाची सुरुवात?

mirzapur ‘मिर्झापूर द मुव्ही’ चित्रपटगृहात दाखल झाला असून, या चित्रपटात वेब सीरिजमधील अनेक लोकप्रिय पात्रे पुन्हा एकदा एकत्र आली आहेत. कालीन भैय्या, मुन्ना, गुड्डू, बबलू, गोलू, बीना आणि स्वीटी यांच्याभोवती कथा पुढे सरकते. मात्र, चित्रपटाची मांडणी वेब सीरिजपेक्षा वेगळी आहे. पात्रांमधील जुने संबंध आणि संघर्ष कायम असले तरी घटनाक्रमाला नव्या पद्धतीने वळण देण्यात आले आहे. विशेषतः चित्रपटाच्या क्लायमॅक्समध्ये अनेक अनपेक्षित घडामोडी पाहायला मिळतात.

 

 

वेब सीरिजमध्ये मुन्ना भैय्या आणि गुड्डू पंडित यांच्यातील संघर्ष निर्णायक टप्प्यावर पोहोचला होता आणि दुसऱ्या सीझनमध्ये गुड्डूने मुन्नाचा जीव घेतला होता. मात्र, चित्रपटात हे दोघे पुन्हा एकत्र दिसतात. त्यांच्यातील जुने वैर कायम असले तरी कालीन भैय्यावर संकट ओढवल्यानंतर परिस्थिती बदलते. कालीन भैय्याला वाचवण्यासाठी मुन्ना आणि गुड्डू आपला संघर्ष बाजूला ठेवतात. बबलूही त्यांच्यासोबत येतो आणि तिघे मिळून कालीन भैय्याला वाचवण्याचा प्रयत्न करतात. त्यामुळे चित्रपटातील या पात्रांची कहाणी वेब सीरिजपेक्षा पूर्णपणे वेगळ्या दिशेने जाते.

 

चित्रपटात रवी किशनने साकारलेला बब्बन यादव मिर्झापूरच्या सत्तेवर कब्जा करण्याच्या उद्देशाने पुढे येतो. कालीन भैय्याला हटवून सिंहासन मिळवण्याची त्याची महत्त्वाकांक्षा कथेला मोठ्या संघर्षाकडे घेऊन जाते. जैसलमेरमध्ये दोन्ही गट आमनेसामने येतात. या संघर्षादरम्यान मुन्ना, गुड्डू आणि बबलू कालीन भैय्याच्या मदतीला धावून येतात आणि त्याची सुटका करण्यात यशस्वी होतात.

 

या घटनांमध्ये कालीन भैय्याचे अपहरणही होते. मात्र, त्याचा मृत्यू होत नाही. मुन्ना, गुड्डू आणि बबलू यांच्या प्रयत्नांमुळे तो या जीवघेण्या संकटातून बाहेर पडतो. मात्र, कालीन भैय्या वाचला म्हणजे कथा संपली असे चित्रपटाचा शेवट स्पष्टपणे सांगत नाही. उलट, मोहित मलिकने साकारलेल्या बिरजू लोहारच्या पात्रामुळे कथेला आणखी नवे वळण मिळते. शेवटी कालीन भैय्याचा खरा शत्रू कोण आहे आणि त्याच्या मनात सूडाची भावना का आहे, याचा खुलासा होतो.

 

चित्रपटाच्या अखेरच्या भागात बीना भाभीशी संबंधित एक धक्कादायक ट्विस्टही पाहायला मिळतो. त्यानंतर पोस्ट-क्रेडिट सीनमध्ये आणखी एक महत्त्वाचा वळण दिले जाते. त्यामुळे ‘मिर्झापूर’च्या जगातील सत्तासंघर्ष पूर्णपणे संपलेला नसल्याचे संकेत मिळतात. मुन्ना आणि गुड्डूचे पुनर्मिलन, बबलूची साथ, कालीन भैय्याची सुटका आणि नव्या शत्रूची एंट्री यामुळे चित्रपटाचा शेवट पुढील कथेबाबत प्रेक्षकांची उत्सुकता कायम ठेवतो.