‘GDN’चा चौथा आठवडाही दमदार

r. madhavan आर. माधवन हा आपल्या वैविध्यपूर्ण भूमिकांमुळे सातत्याने चर्चेत असलेला अभिनेता. भारतीय सिनेमातील सर्वाधिक टिकाऊ पॅन-इंडिया कलाकारांपैकी एक असल्याचे त्याने पुन्हा एकदा सिद्ध केले आहे. दिग्गज संशोधक जी. डी. नायडू यांच्या जीवनावर आधारित त्याचा महत्त्वाकांक्षी आणि हृदयस्पर्शी चरित्रपट ‘GDN’ सध्या प्रदर्शनाच्या चौथ्या आठवड्यातही बॉक्स ऑफिसवर दमदार कामगिरी करत आहे. ७ ऑगस्ट रोजी प्रदर्शित झालेल्या या चित्रपटाने प्रेक्षकांची मने जिंकली असून, सातत्याने दर्जेदार काम करणारा अभिनेता म्हणून माधवनच्या कारकिर्दीलाही या चित्रपटाच्या यशाची नवी किनार लाभली आहे.

 

 

‘GDN’मध्ये माधवनने केवळ दूरदर्शी संशोधक जी. डी. नायडू यांची व्यक्तिरेखा साकारलेली नाही, तर सह-निर्माता म्हणूनही त्याने या प्रकल्पाचे नेतृत्व केले आहे. त्यामुळे या चित्रपटाचे यश त्याच्यासाठी विशेष वैयक्तिक महत्त्वाचे ठरले आहे. नायडू यांच्या जीवनकथेतील प्रामाणिकपणा आणि त्यांचा संघर्ष पडद्यावर मांडण्याच्या प्रयत्नाला मिळत असलेला प्रतिसाद माधवनसाठी समाधानाची बाब आहे.

या चित्रपटाविषयी बोलताना आर. माधवन म्हणतो, “अनेक गोष्टी भारतीयांना परवडणाऱ्या किमतीत उपलब्ध करून देण्यासाठी प्रत्येक अडचणीशी लढलेल्या एका व्यक्तीचा सन्मान करण्यासाठी आणि त्यांची कथा प्रत्येक पिढीसमोर आणण्यासाठी आम्ही हा चित्रपट बनवला आहे. प्रत्येक कुटुंब एकत्र बसून हा चित्रपट पाहताना दिसले आणि आता अधिकाधिक विद्यार्थीही त्यांची कथा जाणून घेत आहेत, हे पाहून खूप बरं वाटतंय. चार आठवडे उलटूनही थिएटरमध्ये अजूनही प्रत्येक वयोगटातील लोकांची गर्दी आहे, ज्यांना जी. डी. नायडूंमध्ये स्वतःचे काहीतरी सापडत आहे. हे असे यश आहे, जे तुमच्यासोबत कायम राहते.”

निर्माते डॉ. वर्गीस मूलन यांनीही माधवनच्या भावनेशी सहमती व्यक्त केली आहे. माधवनची स्टार पॉवर आणि या प्रकल्पाप्रती असलेली बांधिलकी यामुळे वेगवेगळ्या पिढ्यांमधील दरी भरून काढण्यास मदत झाली, असे त्यांनी नमूद केले. “या चित्रपटाने सर्वांशी—आजी-आजोबा, आई-वडील आणि आता त्यांच्या मुलांशीही—ज्या प्रकारे नाते जोडले आहे, त्याने आम्हाला सर्वाधिक प्रभावित केले आहे. केवळ वर्ड ऑफ माउथच्या जोरावर चौथ्या आठवड्यातही हाऊसफुल सुरू राहणे हे सांगते की या कथेला तिचे हृदय सापडले आहे,” असे मूलन यांनी म्हटले.

कृष्णकुमार रामकुमार दिग्दर्शित ‘GDN’ची निर्मिती वर्गीस मूलन पिक्चर्स आणि ट्रायकलर फिल्म्स यांच्या संयुक्त विद्यमाने करण्यात आली आहे. तमिळनाडूसह जगभरातील चित्रपटगृहांमध्ये या चित्रपटाला प्रेक्षकांचा उत्स्फूर्त प्रतिसाद मिळत असून चौथ्या आठवड्यातही त्याची कामगिरी कायम आहे. आता आगामी नेटफ्लिक्स प्रदर्शनामुळे आर. माधवनचा हा महत्त्वाकांक्षी पॅशन प्रोजेक्ट जागतिक प्रेक्षकांपर्यंत पोहोचण्याचा मार्गही मोकळा झाला आहे.