मध्य प्रदेशात संशयास्पद मृत्यूंचे तांडव!

suspicious deaths in sager मध्य प्रदेशातील सागर जिल्ह्यातील बांदा येथे शनिवारी रात्री एक अत्यंत धक्कादायक आणि गंभीर घटना समोर आली आहे. संशयास्पद परिस्थितीत तब्बल १२ जणांचा मृत्यू झाला असून, ५ जणांची प्रकृती अत्यंत चिंताजनक आहे. विषारी किंवा भेसळयुक्त दारूचे सेवन केल्यामुळे ही दुर्घटना घडल्याचा प्राथमिक संशय व्यक्त केला जात आहे. मात्र, या प्रकरणाचे खरे कारण शवविच्छेदन (पोस्टमार्टम) अहवाल आणि पोलीस तपास पूर्ण झाल्यानंतरच स्पष्ट होणार आहे.शनिवारी रात्री अचानक प्रकृती खालावल्यामुळे सुमारे डझनभर नागरिकांना घाईघाईने बांदा येथील सिव्हिल हॉस्पिटलमध्ये दाखल करण्यात आले होते. तेथे उपचारादरम्यान ९ जणांचा मृत्यू झाला, तर इतर काही जणांनी उपचारापूर्वीच प्राण गमावले होते. या दुर्घटनेतील गंभीर जखमी झालेल्या ५ रुग्णांना पुढील उपचारासाठी सागर येथील बुंदेलखंड मेडिकल कॉलेजमध्ये (बीएमसी) हलवण्यात आले आहे. सध्या बांदा रुग्णालयात मृतांचे शवविच्छेदन सुरू आहे.

 

 

 

घटनेचे गांभीर्य लक्षात घेऊन जिल्हाधिकारी प्रतिभा पाल आणि पोलीस अधीक्षक अनुराग सुजानिया यांच्यासह वरिष्ठ प्रशासकीय अधिकारी तातडीने बांदा येथे पोहोचले. अधिकाऱ्यांनी रुग्णालयाची पाहणी करून परिस्थितीचा आढावा घेतला. या दुर्घटनेत गुगरा खुर्द येथील गोलू उर्फ चमन लोधी (४५) व उजियार सिंग लोधी (५६), नौराज येथील दिग्विजय लोधी (२८) व कर्तारसिंग लोधी (३०), विनायक येथील रोशन (३०) आणि नौराज-गुगरा येथील राजेंद्र लोधी (३२) यांचा समावेश आहे. दरम्यान, गोलू उर्फ चमन हा कर्करोगानेही ग्रस्त होता.

 

 

दुसरीकडे, चौका येथील हरनाम राय (४२), दलपतपूर येथील उत्तम नथू नायक (४२), गुगरा खुर्द येथील मंगल रजक (४०), हिनौटा येथील परम आदिवासी (४२) आणि धनसिंग आदिवासी (३०) यांची प्रकृती चिंताजनक असून त्यांच्यावर बीएमसी येथे उपचार सुरू आहेत. या घटनेमुळे परिसरात तणावाचे वातावरण निर्माण झाले असून शांतता व कायदा सुव्यवस्था राखण्यासाठी बांदामध्ये अतिरिक्त पोलीस दल तैनात करण्यात आले आहे. प्रशासन सध्या भेसळयुक्त दारूच्या कोनासह सर्व संभाव्य कारणांचा सखोल तपास करत आहे.