‘मिर्झापूर: द मूव्ही’ पाहताना थिएटरमध्येच हाणामारी

mirzapur बहुचर्चित ‘मिर्झापूर: द मूव्ही’ अखेर 4 सप्टेंबर रोजी चित्रपटगृहांमध्ये प्रदर्शित झाला. वेब सीरिजपासूनच या फ्रँचायझीची प्रचंड क्रेझ पाहायला मिळत असून, पंकज त्रिपाठी, अली फजल, दिव्येंदू शर्मा आणि रवी किशन यांसारख्या कलाकारांच्या दमदार अभिनयामुळे चित्रपट प्रदर्शनापूर्वीपासूनच चर्चेत होता. मात्र, आता चित्रपट प्रदर्शित झाल्यानंतर एका वेगळ्याच कारणामुळे तो चर्चेत आला आहे. चित्रपट पाहण्यासाठी आलेल्या काही प्रेक्षकांमध्ये थेट थिएटरमध्येच हाणामारी झाल्याचा व्हिडीओ सोशल मीडियावर व्हायरल होत आहे.

 

 

व्हायरल व्हिडीओमध्ये काही तरुण एकमेकांशी जोरदार भांडताना दिसत आहेत. या हाणामारीदरम्यान लाथा-बुक्क्यांसोबत बेल्टचाही वापर झाल्याचं व्हिडीओमध्ये दिसून येत आहे. परिस्थिती चिघळल्यानंतर काही प्रेक्षकांनी मध्यस्थी करत वाद थांबवण्याचा प्रयत्न केल्याचंही पाहायला मिळत आहे. ही घटना शनिवारी रात्री घडल्याचं सांगितलं जात आहे.

सोशल मीडियावर व्हायरल झालेल्या mirzapur माहितीनुसार, ही हाणामारी मुन्ना भैया आणि गुड्डू पंडित यांच्या चाहत्यांमध्ये झाल्याचा दावा केला जात आहे. ‘मिर्झापूर’च्या कथानकात या दोन्ही पात्रांमध्ये असलेली कट्टर दुश्मनी प्रेक्षकांना चांगलीच परिचित आहे. त्यामुळे पडद्यावरची ही स्पर्धा काही चाहत्यांनी थेट थिएटरमध्ये आणल्याची चर्चा सोशल मीडियावर रंगली आहे.

मात्र, या घटनेमागचं नेमकं कारण काय होतं, तसेच हाणामारीत सहभागी असलेल्या व्यक्ती कोण आहेत, याबाबत अद्याप अधिकृत माहिती समोर आलेली नाही. त्यामुळे सोशल मीडियावर करण्यात येणाऱ्या दाव्यांना अधिकृत दुजोरा मिळालेला नाही.

दरम्यान, ‘मिर्झापूर: द मूव्ही’ला बॉक्स ऑफिसवर दमदार प्रतिसाद मिळत असल्याचं समोर आलं आहे. प्रदर्शनानंतर अवघ्या दोन दिवसांत चित्रपटाने जगभरात 75 कोटी रुपयांपेक्षा अधिक कमाई केल्याचं समजत आहे. यावरून प्रेक्षकांमध्ये ‘मिर्झापूर’ फ्रँचायझीची असलेली क्रेझ किती मोठी आहे, याचा अंदाज येतो.

वेब सीरिजच्या प्रचंड लोकप्रियतेनंतर ‘मिर्झापूर’ फ्रँचायझी पहिल्यांदाच मोठ्या पडद्यावर आली आहे. कालीन भैया, गुड्डू आणि मुन्ना या लोकप्रिय पात्रांमुळे चित्रपटाबाबत चाहत्यांमध्ये आधीपासूनच मोठी उत्सुकता होती. आता चित्रपटगृहांमध्येही या पात्रांच्या चाहत्यांमध्ये उत्साह पाहायला मिळत आहे.

‘मिर्झापूर: द मूव्ही’मध्ये पंकज त्रिपाठी, अली फजल, दिव्येंदू शर्मा, रसिका दुग्गल, श्वेता त्रिपाठी आणि रवी किशन यांसारखे कलाकार पुन्हा एकदा ‘मिर्झापूर’च्या विश्वात परतले आहेत. चित्रपट पाहिल्यानंतर प्रेक्षकांनी सोशल मीडियावर आपल्या प्रतिक्रिया शेअर केल्या असून, अनेकांनी हा चित्रपट वेब सीरिजपेक्षाही दमदार असल्याचं म्हटलं आहे.

एकीकडे चित्रपटाला बॉक्स ऑफिसवर चांगला प्रतिसाद मिळत असताना दुसरीकडे थिएटरमधील कथित हाणामारीचा व्हिडीओ व्हायरल झाल्याने ‘मिर्झापूर: द मूव्ही’ पुन्हा एकदा चर्चेच्या केंद्रस्थानी आला आहे.