नेपाळमध्ये आज राष्ट्रध्वज अर्ध्यावर!

National flag at half in Nepal today २६ ऑगस्ट रोजी आलेल्या भीषण पुरामुळे झालेल्या विध्वंसातून नेपाळ अद्याप सावरलेले नाही. या नैसर्गिक आपत्तीत आतापर्यंत १,३४० जणांचा मृत्यू झाला असून सुमारे ५,००० नागरिक बेपत्ता आहेत. तिबेटजवळील रसुवा तसेच आसपासच्या जिल्ह्यांना पुराचा मोठा फटका बसला असून मोठ्या प्रमाणावर जीवित आणि मालमत्तेची हानी झाली आहे. या पार्श्वभूमीवर नेपाळ सरकारने सोमवारी, ७ सप्टेंबर रोजी राष्ट्रीय शोकदिन जाहीर करत सार्वजनिक सुट्टी दिली आहे. आपत्तीत हजारो नागरिक बेघर झाले असून अनेक मृतदेह हाती लागले आहेत. मृतांप्रती शोक व्यक्त करण्यासाठी नेपाळच्या विविध भागांत सामूहिक शोकसभा आयोजित करण्यात आल्या. बिहार-नेपाळ सीमेवरील रक्सौलजवळील बिरगंज महानगरपालिकेच्या घंटाघर चौकातही शोकसभा घेण्यात आली. यावेळी दिवंगतांना श्रद्धांजली अर्पण करण्यासाठी दिवे प्रज्वलित करण्यात आले.

 

 

 

 

या दुर्घटनेला १३ दिवस पूर्ण झाले आहेत. हिंदू धार्मिक परंपरेनुसार मृत्यूनंतरचा तेरावा दिवस हा शोक व्यक्त करण्याच्या दृष्टीने महत्त्वाचा मानला जातो. त्याच पार्श्वभूमीवर नेपाळच्या गृह मंत्रालयाने सोमवारी देशातील सरकारी कार्यालये तसेच परदेशातील नेपाळी राजनैतिक दूतावासांमध्ये राष्ट्रध्वज अर्ध्यावर फडकवण्याचा निर्णय घेतला आहे. दरम्यान, पुरामुळे उद्ध्वस्त झालेल्या भागांमध्ये बचाव आणि शोधमोहीम अद्याप सुरू आहे. घरे, रस्ते, पूल, जलविद्युत प्रकल्पांसह अन्य पायाभूत सुविधांचे मोठे नुकसान झाले आहे.

जलविद्युत प्रकल्पांच्या बोगद्यांमध्येही शोधकार्य सुरू असून तेथे अडकलेल्या नागरिकांना बाहेर काढण्यासाठी प्रयत्न वाढवण्यात आले आहेत. नेपाळमध्ये कार्यरत भारतीय लष्कर, एनडीआरएफ आणि बॉर्डर रोड्स अर्थात बीआरओकडून बचावकार्याबरोबरच पर्यायी मार्ग उभारण्याचे कामही सुरू आहे. बेपत्ता नागरिकांचा शोध घेण्यासाठी सुरक्षा दल आणि बचाव पथकांकडून मोहीम सुरूच आहे. या पुरामुळे किमान ३२,००० कुटुंबे विस्थापित झाली असून ७,५०० घरे पूर्णपणे उद्ध्वस्त झाली आहेत. त्यामुळे नागरिकांच्या उपजीविकेवरही मोठा परिणाम झाला असून अत्यावश्यक पायाभूत सुविधांचे नुकसान झाल्याने परिस्थिती पूर्वपदावर आणण्याचे मोठे आव्हान नेपाळसमोर आहे.