षडाष्टक योगाने वाढणार ४ राशींचे टेन्शन?

Shad-Ashtak Yog increase tension ज्योतिषशास्त्रानुसार ग्रहांच्या स्थितीचा मानवी जीवनावर परिणाम होत असल्याचे मानले जाते. ६ सप्टेंबर २०२६ रोजी सूर्य आणि शनि यांच्यात षडाष्टक योग तयार झाला आहे. ज्योतिषीय मतानुसार हा योग काही राशींसाठी आव्हानात्मक ठरू शकतो. या काळात मानसिक तणाव, नकारात्मक विचार, आर्थिक नुकसान, कामातील अडथळे तसेच वाद-विवाद वाढण्याची शक्यता असल्याचे सांगितले जात आहे. या योगाचा प्रभाव साधारण ३ ते ४ दिवस राहू शकतो.ज्योतिषशास्त्रानुसार सूर्याला ग्रहांचा राजा मानले जाते, तर शनि कर्माचा दाता म्हणून ओळखला जातो. सध्या सूर्य सिंह राशीत असून शनि मीन राशीत आहे. सूर्य आणि शनि यांच्यात १५० अंशांचे अंतर निर्माण झाल्याने षडाष्टक योग तयार झाल्याचे सांगितले जाते. दोन ग्रह सहाव्या आणि आठव्या स्थानाच्या संबंधात म्हणजेच १५० अंशांच्या अंतरावर असतील, तेव्हा हा योग तयार होतो. सूर्य आणि शनि हे पिता-पुत्र असूनही ज्योतिषशास्त्रात त्यांच्यात वैरभाव असल्याचे मानले जाते. त्यामुळे या योगाला अशुभ मानले जाते.

 

या ग्रहस्थितीचा परिणाम वैयक्तिक आणि सामाजिक जीवनावर होऊ शकतो, असे ज्योतिषीय मत आहे. काही व्यक्तींना मानसिक तणाव, अज्ञात भीती किंवा नकारात्मक विचारांचा सामना करावा लागू शकतो. कामाच्या ठिकाणी अडथळे निर्माण होण्यासोबतच वरिष्ठ अधिकाऱ्यांशी मतभेद किंवा वाद होण्याची शक्यता व्यक्त केली जात आहे. काही जणांना दुखापत किंवा आजारपणाच्या समस्यांनाही सामोरे जावे लागू शकते. ज्योतिषशास्त्रानुसार कन्या, मकर, कुंभ आणि मीन या चार राशींनी पुढील काही दिवस विशेष सावधगिरी बाळगण्याची गरज आहे. या काळात कार्यालयीन ठिकाणी विनाकारण वाद घालणे टाळावे आणि वरिष्ठांशी बोलताना संयम ठेवावा, असा सल्ला दिला जात आहे. नवीन गुंतवणूक किंवा मोठी जोखीम घेण्यासाठीही हा काळ अनुकूल नसल्याचे सांगितले जाते. आर्थिक व्यवहार करताना विशेष काळजी घेण्याबरोबरच अत्यावश्यक नसल्यास मोठे व्यवहार काही दिवस पुढे ढकलण्याचा सल्ला दिला जात आहे. ज्योतिषीय उपायांनुसार शनिवारी संध्याकाळी शनिदेवासमोर मोहरीच्या तेलाचा दिवा लावण्यास सांगितले आहे. शनि मंदिरात जाणे शक्य नसल्यास पिंपळाच्या झाडाखालीही मोहरीच्या तेलाचा दिवा लावता येतो, असे सांगण्यात आले आहे.