ट्विंकल खन्नाच्या ‘मुघल’ वक्तव्यावरून नवा वाद
‘जेवणाची तुलना हिंसक इतिहासाशी का?’ असा सवाल
Total Views |
मुंबई
twinkle khanna बॉलिवूड अभिनेत्री ट्विंकल खन्ना सध्या तिच्या एका वक्तव्यामुळे चर्चेत आली आहे. ट्विंकलने तिच्या ‘मिसेस फनीबोन्स’ या कॉलममध्ये अन्न व औषध प्रशासनाचे आयुक्त तुकाराम मुंढे यांचा संदर्भ देत केलेल्या विधानामुळे सोशल मीडियावर नवा वाद निर्माण झाला आहे. मुघलांचा इतिहास पुस्तकांमधून हटवण्यापेक्षा मुघल खाद्यसंस्कृतीतील पदार्थ जेवणातून हटवावेत, अशा आशयाचं विधान ट्विंकलने केलं आहे. तिच्या या वक्तव्यावरून नेटकऱ्यांमध्ये संतापाची प्रतिक्रिया उमटताना दिसत आहे.
ट्विंकल खन्नाने आपल्या कॉलममध्ये मुघल साम्राज्याचा संदर्भ देताना म्हटलं आहे की, जे लोक इतिहासाच्या पुस्तकांमधून मुघलांना हटवू इच्छितात, त्यांनी त्याची सुरुवात लंचपासून करावी. त्यासाठी आधी कोफ्ते, कोरमा आणि कबाब यांसारख्या पदार्थांचा त्याग करावा, असं तिने म्हटलं आहे. मुघलाई पनीरही ठेवता आणि खाता येणार नाही, अशा आशयाचं वक्तव्यही ट्विंकलने केलं आहे. तिचं हे लिखाण सोशल मीडियावर मोठ्या प्रमाणात व्हायरल झालं असून, त्यावरून विविध प्रतिक्रिया उमटत आहेत.
ट्विंकलच्या या विधानावर इंटरनेटवरील कंटेंट क्रिएटर शीमा खेर यांनी तीव्र नाराजी व्यक्त केली आहे. केवळ शीमा खेरच नव्हे, तर इतर अनेक सोशल मीडिया युजर्सनीही ट्विंकलच्या विधानावर प्रतिक्रिया देत तिच्यावर टीका केली आहे.
शीमा खेर यांनी ट्विंकलच्या भूमिकेवर प्रश्न उपस्थित करताना म्हटलं आहे की, जेवणाची तुलना हिंसक इतिहासाशी करणं ना मजेदार आहे, ना शहाणपणाचं. आपल्या भूमिकेच्या समर्थनार्थ त्यांनी ‘केसरी’ या चित्रपटाचा दाखला दिला आहे. विशेष म्हणजे, हा चित्रपट ट्विंकल खन्नाचा पती आणि अभिनेता अक्षय कुमार याने केला आहे.
शीमा यांनी सारागढीच्या लढाईसारख्या ऐतिहासिक घटनांचा संदर्भ देत म्हटलं आहे की, अशा घटनांचा शालेय पाठ्यपुस्तकांमध्ये समावेश नसल्याने ‘केसरी’सारखे चित्रपट बनवले गेले. त्यांनी मिश्किलपणे असा सवाल केला की, चित्रपट पाहिल्यानंतर ट्विंकलला त्या काळातील हिंसाचार समजला आणि तो आवडला, तर त्यानंतर तिने चिकन किंवा इतर पदार्थ खाणं सोडून दिलं का?
इतिहासातील हिंसा आणि संघर्षावर आधारित चित्रपट आपण पाहू शकतो, शहीदांच्या पराक्रमाचा स्वीकार करू शकतो आणि त्याच वेळी जेवणाचाही आनंद घेऊ शकतो, मग इतिहासाच्या चर्चेत अचानक खाद्यपदार्थांचा युक्तिवाद म्हणून वापर का केला जात आहे, असा प्रश्न शीमा यांनी उपस्थित केला आहे.पुढे शीमा खेर यांनी मुघलांच्या इतिहासाकडे केवळ खाद्यपदार्थांच्या दृष्टिकोनातून पाहण्यास विरोध केला आहे. मुघल भारतात केवळ कबाब आणि कोरमासारखे पदार्थ देण्यासाठी आले नव्हते, तर त्यांच्या काळात युद्धे, विजय आणि रक्तपातही झाला होता, असं त्यांनी म्हटलं आहे. त्यामुळे इतिहासाकडे केवळ जेवणाच्या दृष्टिकोनातून पाहण्याऐवजी त्यातील विविध पैलू समजून घेण्याची गरज असल्याचं त्यांनी स्पष्ट केलं आहे.दरम्यान, ट्विंकल खन्नाच्या या वक्तव्यामुळे सोशल मीडियावर सुरू झालेला वाद सध्या चांगलाच रंगला आहे. तिच्या विधानावरून नेटकऱ्यांमध्ये मतमतांतरे व्यक्त होत असून, शीमा खेर यांच्या प्रतिक्रियेनंतर हा मुद्दा आणखी चर्चेत आला आहे.