राजकीय 'भूकंप' ज्येष्ठ नेते हीरा ठाकूर यांचा काँग्रेसमध्ये प्रवेश

heera thakur देशातील सर्वाधिक लोकसंख्या तसेच सर्वाधिक विधानसभा सदस्यसंख्या असलेल्या उत्तर प्रदेशातील विधानसभा निवडणूक अवघ्या काही महिन्यांवर येऊन ठेपली आहे. त्यामुळे राज्यातील राजकीय वातावरण चांगलेच तापू लागले असून, विविध पक्षांतील नेत्यांच्या पक्षांतरालाही सुरुवात झाली आहे. या पार्श्वभूमीवर सत्ताधारी भाजपला मोठा राजकीय धक्का बसला आहे. भाजपचे ज्येष्ठ नेते आणि माजी आमदार हीरा ठाकूर यांनी पक्षाला रामराम ठोकत काँग्रेसमध्ये प्रवेश केला आहे.

 

 

जातनिहाय जनगणनेच्या मुद्द्यावरून मागासवर्गीय समाजाची फसवणूक झाल्याची भावना निर्माण झाल्याने आपण भाजप सोडण्याचा निर्णय घेतल्याचे हीरा ठाकूर यांनी स्पष्ट केले. काँग्रेसचे उत्तर प्रदेश प्रभारी राजेंद्र पाल गौतम, पक्षाच्या ओबीसी विभागाचे अध्यक्ष अनिल जयहिंद आणि खासदार राजेंद्र राठोड यांच्या उपस्थितीत त्यांनी काँग्रेसचे सदस्यत्व स्वीकारले.

हीरा ठाकूर यांच्या काँग्रेस प्रवेशाचे स्वागत करताना ओबीसी विभागाचे अध्यक्ष अनिल जयहिंद यांनी भाजपवर जोरदार टीका केली. जातनिहाय जनगणनेच्या मुद्द्यावर ज्या पद्धतीने ओबीसी समाजाची फसवणूक झाली, त्यामुळे व्यथित होऊन हीरा ठाकूर यांनी मनुवादी मानसिकतेच्या भाजपची साथ सोडल्याचे जयहिंद यांनी म्हटले. आगामी विधानसभा निवडणुकीच्या पार्श्वभूमीवर ठाकूर यांचा काँग्रेस प्रवेश भाजपसाठी महत्त्वाचा धक्का मानला जात आहे.

काँग्रेसमध्ये प्रवेश केल्यानंतर हीरा ठाकूर यांनी बिहारचे माजी मुख्यमंत्री आणि समाजवादी नेते कर्पुरी ठाकूर यांचा उल्लेख केला. देशातील मागासवर्गीयांना आरक्षण देण्याच्या दिशेने महत्त्वाचे पाऊल उचलणारे कर्पुरी ठाकूर हे देशातील पहिले नेते होते, असे त्यांनी सांगितले. बिहारमध्ये त्यांनी मागासवर्गीयांना आरक्षण दिले; मात्र आजही मागास समाजाची मोठी लोकसंख्या आपल्या अधिकारांपासून वंचित असल्याचे ठाकूर यांनी नमूद केले.

जातनिहाय जनगणनेचा मुद्दा सातत्याने लावून धरल्याबद्दल हीरा ठाकूर यांनी काँग्रेसचे ज्येष्ठ नेते राहुल गांधी यांचेही आभार मानले. मागासवर्गीयांच्या हक्कांचा प्रश्न आणि जातनिहाय जनगणना यांना राजकीय चर्चेच्या केंद्रस्थानी आणण्याच्या काँग्रेसच्या भूमिकेला त्यांनी यावेळी पाठिंबा दर्शवला.

हीरा ठाकूर यांची राजकीय  heera thakur  कारकीर्दही दीर्घ राहिली आहे. ते सुमारे १२ वर्षे विधान परिषदेचे सदस्य होते. याशिवाय त्यांनी उत्तर प्रदेश राज्य मागासवर्गीय आयोगाचे उपाध्यक्ष म्हणूनही जबाबदारी सांभाळली आहे. या काळात त्यांना राज्यमंत्रिपदाचा दर्जा देण्यात आला होता.

अतिमागास समाजाच्या अधिकारांसाठी हीरा ठाकूर सातत्याने आवाज उठवत आले आहेत. मागासवर्गीयांच्या प्रश्नांवर सक्रियपणे भूमिका मांडण्याबरोबरच ते ‘राष्ट्रीय कर्पुरी ठाकूर विचार मंच’ नावाची संघटनाही चालवतात. त्यामुळे उत्तर प्रदेश विधानसभा निवडणुकीच्या तोंडावर त्यांचा काँग्रेस प्रवेश हा मागासवर्गीय मतदारांच्या राजकारणाच्या दृष्टीने महत्त्वाचा ठरण्याची शक्यता आहे.