नेपाळला नैसर्गिक संकटांचा दुहेरी तडाखा पूरानंतर ५.३ तीव्रतेचा भूकंप

nepal earthquake गेल्या काही दिवसांपासून अतिवृष्टी, पूर आणि भूस्खलनाच्या संकटाचा सामना करणाऱ्या नेपाळमध्ये परिस्थिती हळूहळू पूर्वपदावर येत असतानाच मंगळवारी रात्री भूकंपाचा जोरदार धक्का बसला. देशाच्या वायव्य भागातील मुस्तांग जिल्ह्यात ५.३ तीव्रतेच्या भूकंपाची नोंद झाली. या भूकंपाचे हादरे आसपासच्या मनांग, डोल्पा आणि म्याग्दी जिल्ह्यांमध्येही जाणवले. त्यामुळे आधीच नैसर्गिक आपत्तीच्या तडाख्यात सापडलेल्या नागरिकांच्या चिंतेत आणखी भर पडली आहे.

 

 

राष्ट्रीय भूकंप निरीक्षण आणि संशोधन केंद्राच्या माहितीनुसार, मंगळवारी रात्री सुमारे ९ वाजून ५३ मिनिटांनी भूकंपाचे धक्के जाणवले. मुस्तांग जिल्ह्यातील लोमानथांग परिसर हा भूकंपाचा केंद्रबिंदू असल्याचे सांगण्यात आले. हा परिसर राजधानी काठमांडूपासून अंदाजे ३७५ किलोमीटर अंतरावर आहे.

भूकंपाची तीव्रता ५.३ असल्याने काही काळ परिसरात भीतीचे वातावरण निर्माण झाले. मुस्तांग जिल्ह्यासह मनांग, डोल्पा आणि म्याग्दी येथेही सौम्य ते मध्यम स्वरूपाचे धक्के जाणवले. मात्र, भूकंपानंतर तातडीने मोठ्या प्रमाणावर जीवितहानी किंवा मालमत्तेच्या नुकसानीची माहिती समोर आलेली नाही. स्थानिक प्रशासनाकडून परिस्थितीचा आढावा घेण्याचे काम सुरू होते.

दरम्यान, नेपाळमध्ये मागील काही दिवसांपासून मुसळधार पावसाने अनेक भागांना मोठा फटका बसला आहे. अतिवृष्टीमुळे नद्या दुथडी भरून वाहत असून, अनेक ठिकाणी पूरस्थिती निर्माण झाली आहे. तसेच दरडी कोसळण्याच्या घटनांमुळे रस्ते वाहतूक विस्कळीत झाली असून अनेक भागांचा संपर्कही प्रभावित झाला आहे. या संकटातून सावरण्याचे प्रयत्न सुरू असतानाच भूकंपाचा धक्का बसल्याने प्रशासनासमोर आणखी एक आव्हान उभे ठाकले आहे.

याचदरम्यान, नेपाळमधील पर्वत जिल्ह्यात आणखी एक धोकादायक परिस्थिती निर्माण झाल्याचे समोर आले. गंडकी प्रांतातील किमरुंग नदीच्या परिसरात भूस्खलन झाल्याने नदीचा प्रवाह अडवला गेला आहे. परिणामी नदीतील पाण्याची पातळी अचानक वाढण्याची शक्यता निर्माण झाली आहे.

पूर अंदाज विभागाने मंगळवारी रात्री नागरिकांना याबाबत सतर्क केले. भूस्खलनामुळे नदीचा प्रवाह रोखला गेल्याने पुढील काळात अचानक पाण्याचा प्रवाह वाढण्याची किंवा पूरस्थिती निर्माण होण्याची शक्यता प्रशासनाने व्यक्त केली आहे. किमरुंग नदी ही मोदी नदीला मिळणारी उपनदी आहे.नदीच्या खालच्या भागात राहणाऱ्या नागरिकांना विशेष खबरदारी घेण्याचे आवाहन करण्यात आले आहे. नयापुल, बिरेठांती आणि आसपासच्या वस्त्यांमधील नागरिकांनी सुरक्षित ठिकाणी स्थलांतर करण्याचा सल्ला देण्यात आला आहे. प्रशासनाकडून नदीच्या स्थितीवर आणि संभाव्य धोक्यावर सतत लक्ष ठेवले जात आहे.अतिवृष्टी, पूर आणि भूस्खलनाच्या संकटातून सावरण्याचा प्रयत्न सुरू असतानाच भूकंपाचा धक्का आणि नदीचा प्रवाह रोखला जाण्याची घटना घडल्याने नेपाळसमोरील नैसर्गिक आपत्तीचे आव्हान अधिकच गंभीर झाले आहे. प्रशासनाकडून संभाव्य नुकसानीचा आढावा घेतला जात असून, नागरिकांना सतर्क राहण्याचे आवाहन करण्यात आले आहे.