महाराष्ट्रातील दुष्काळग्रस्त शेतकऱ्यांसाठी शासनाची मदत जाहीर
स्रोत: Tarun Bharat, Nagpur   दिनांक :27-Jan-2019
मुंबई :  
 
राज्यातील १५१ तालुक्यातील दुष्काळग्रस्त शेतकऱ्यांसाठी शासनाकडून पहिली मदत जाहीर करण्यात आली असून शेतकऱ्यांना २ हजार ९०० कोटींची मदत मिळणार आहे. शेतकऱ्यांना जाहीर झालेली मदत दोन टप्प्यात मिळणार असून हे पैसे थेट शेतकऱ्यांच्या बँक खात्यात जमा होणार आहेत. 
 
 
 
दोन हेक्टर क्षेत्रातील ३० टक्क्यांहून अधिक नुकसान झालेल्या शेतकऱ्यांना दोन टप्प्यात ६ हजार ८०० रुपयांची मदत मिळणार आहे. पहिल्या टप्प्यात हंगामी पीक उत्पादक शेतकऱ्यांना ३ हजार ४०० रुपये मिळणार आहेत. बहुवार्षिक पिकांसाठी दोन हेक्टरपर्यंत १८ हजार रुपयांची मदत मिळणार आहे. पहिल्या टप्प्यात शेतकऱ्यांना प्रत्येकी ९ हजार रुपये मिळणार आहेत. सरकारने जाहीर केलेल्या मदतीच्या दुसऱ्या टप्प्यातील मदत शेतकऱ्यांच्या बँक खात्यात ३१ मार्चपूर्वी जमा होणार आहे.
हंगामी पीक उत्पादक शेतकऱ्यांना कमीत कमी १ हजार रुपये तर फळबाग शेतकऱ्यांना कमीत कमी दोन हजार रुपये मिळणार आहेत. हंगामी पीक घेणाऱ्या आणि दोन हेक्टरपर्यंत पात्र असलेल्या शेतकऱ्यांची संख्या अंदाजे २१ लाख ३८ हजार ९७० इतकी आहे. तर फळबाग आणि दोन हेक्टरपर्यंत क्षेत्र असलेल्या पात्र शेतकऱ्यांची संख्या अंदाजे ८ लाख ८ हजार ५५ इतकी असल्याची माहिती आहे. ३१ मार्चपर्यंत सर्व पात्र शेतकऱ्यांच्या बँक खात्यात पैसे जमा होणार आहे. परंतु, आचारसंहिता घोषित झालेल्या २६४ ग्रामपंचायतींना तूर्तास ही मदत मिळणार नाही. शेतकऱ्यांनी ज्या बँक खात्याचे आधार लिंक केले आहे, त्याच खात्यावर हे पैसे जमा होणार आहेत.