बेनामी संपत्ती प्रकरणातून शाहरुख आरोपमुक्त
स्रोत: Tarun Bharat, Nagpur   दिनांक :30-Jan-2019
बेनामी संपत्ती प्रकरणी अभिनेता शाहरुख खान याला लवादानं दिलासा दिला आहे. अलिबागमधील मालमत्तेचा लाभार्थी असल्याच्या आरोपांतून त्याची मुक्तता करण्यात आली आहे. तसंच मालमत्ता जप्तीची केलेली कारवाई निराधार असल्याचं नमूद करत लवादानं आयकर विभागाला फटकारलं आहे.
 
 
 
 
लवादाचे प्रमुख डी. सिंघई आणि सदस्य तुषार व्ही. शाह यांच्या खंडपीठासमोर या प्रकरणाची सुनावणी झाली. शाहरूख आणि कंपनीविरोधातील कारवाईच्या आदेशावरूनही लवादानं आयकर विभागावर ताशेरे ओढले. गेल्या वर्षी फेब्रुवारीत व्यवसायाच्या हेतूनं झालेल्या देवाण-घेवाणीला बेनामी व्यवहार झाल्याचं म्हणू शकत नाही. कारण कर्जाच्या माध्यमातून पैशांची व्यवस्था करण्यात आली आहे. त्यामुळं अलिबागमधील मालमत्ता ही बेनामी संपत्ती नाही आणि आयकर विभागानं केलेली जप्तीची कारवाई अयोग्य असल्याच्या निष्कर्षापर्यंत आम्ही पोहोचलो आहोत, असं खंडपीठानं स्पष्ट केलं आहे.
 
 
आयकर विभागानं रायगडमधील अलिबाग येथील शेतजमीन, फार्महाऊस आणि भूखंडावर जप्तीची कारवाई केली होती. त्याची किंमत अंदाजे १५ कोटी रुपये आहे. या प्रकरणात आयकर विभागानं शाहरुख खान आणि मेसर्स देजा वू फार्म्स प्रायव्हेट लिमिटेड या कंपनीला आरोपी केलं होतं.