२ वर्षांनी दयाबेन परतली!

    दिनांक :15-Oct-2019
मुंबई,
प्रसिद्ध मालिका 'तारक मेहता का उल्टा चष्मा' मधील 'दयाबेन' ची भूमिका साकारणारी अभिनेत्री दिशा वकानी मालिका सोडणार असल्याची चर्चा रंगलेली असताना मालिकेत तिची पुन्हा एकदा एन्ट्री होणार आहे. दिशानं या एपिसोडसाठी चित्रीकरणाला सुरुवात केल्याची माहिती मिळाली आहे.

 
 
गुजरातमधील अंबाजी मंदिरात 'तारक मेहता का उल्टा चष्मा' मालिकेतील एका दृश्याचे चित्रीकरण सध्या होत आहे. या दृश्यात दिशा अर्थात दयाबेन तिचे ऑनस्क्रिन पती जेठालाल, मुलगा टप्पू आणि गोकुळधाम सोसायटीमध्ये राहणाऱ्या इतर सगळ्या रहिवाशांशी फोनवर बोलताना दिसणार आहे. 'मी लवकरच गोकुळधाममध्ये परत येतेय' असा डायलॉगसुद्धा तिच्या तोंडी आहे.
कार्यक्रमाचे निर्माते असित मोदी यांनी दयाबेन मालिकेत पुन्हा परतणार असल्याच्या बातमीवर शिक्कामोर्तब केलं आहे. एका मुलाखतीत ते म्हणाले,' दिशा वकानी पुन्हा शोमध्ये दिसणार आहे. मात्र, त्यासाठी एक महिन्यांचा वेळ लागू शकतो.' त्यामुळे आता मालिकेत दयाबेनची एन्ट्री कशी आणि कधी होते हे पाहणं महत्त्वाचं ठरणार आहे.
दोनवर्षांपासून सुट्टीवर
तारक मेहता का उल्टा चष्मा या लोकप्रिय मालिकेतील दयाबेनच्या पात्राला प्रेक्षकांनी डोक्यावर उचलून धरलं होतं. मात्र, दयाबेनची भूमिका साकारणारी दिशा वाखानीनं प्रसूती रजेनंतर मालिकेचा निरोप घेतला होता. दिशा वकानी सप्टेंबर २०१७पासून ‘तारक मेहता…’ मालिकेपासून लांब होत्या. मधल्या काळात दिशा वकानीचे पती आणि प्रोडक्शन हाऊसमध्ये दिशाच्या चित्रीकरणाच्या वेळा आणि मानधनावरून वाद झाल्याची माहिती समोर आली होती. तसंच, दिशानं निर्मात्यांसमोर काही अटी ठेवल्याचंही बोललं जातं होतं.
टीआरपी कमी
दिशानं मालिका सोडल्यानंतर कार्यक्रमाचा टीआरपी घसरला होता. त्यानंतर निर्मात्यांनी दिशा वकानीच्या जागी अभिनेत्री विभूती शर्मा दिसणार असल्याचंही वृत्त आलं होतं. मात्र, विभूतीनं सोशल मीडियावर या सगळ्या अफवा असल्याचं स्पष्ट केलं होतं. तारक मेहता का उल्टा चष्माच्या निर्मात्यांनीही अद्याप दयाबेनच्या भूमिकेसाठी कोणाचीही निवड करण्यात आली नसल्याचं म्हटलं होतं. तर, जेठालालची भूमिका साकारणारे दिलीप जोशी यांनीही दिशानंचं दयाबेनची भूमिका करावी अशी इच्छा व्यक्त केली होती. त्यांनी एका मुलाखतीत तसं बोलूनही दाखवलं होतं. दिशा गेल्या १० वर्षांपासून दयाबेनची भूमिका साकारत होती. त्यामुळं या पुढंही तिनंचं ही भूमिका साकारावी असं मत दिलीप जोशी यांनी व्यक्त केलं होतं.
जेठालाल म्हणतोय दयाबेनसाठी दिशाच परफेक्ट
पण आता दयाबेन पुन्हा येणार असल्याची चर्चा रंगल्यामुळे चाहते तिला पुन्हा एकदा दया बेनच्या रुपात पाहण्यासाठी आतुर झाले आहेत.