महादेव अग्निहोत्री पुन्हा येणार प्रेक्षकांच्या भेटीला

    दिनांक :28-Oct-2019
|
मुंबई,
'अग्निहोत्र -२' मालिकेची घोषणा झाल्यापासून प्रेक्षकांना मालिकेत नवीन काय घडणार या विषयी उत्सुकता लागली आहे. अग्निहोत्रच्या नव्या पर्वात नवीन कथा आहे. कथेप्रमाणेच मालिकेत नवे चेहरेही दिसणार का असा प्रश्न चाहत्यांना पडला होता. नुकताच वाहिनीनं एक प्रोमो शेअर केला आहे. यात अभिनेते शरद पोंक्षे दिसत आहेत. अग्निहोत्रच्या नव्या पर्वात शरद पोंक्षे यांची भूमिका कायम राहणार आहे.

 
शरद पोंक्षे यांनी अग्निहोत्रच्या पहिल्या पर्वात महादेव ही व्यक्तिरेखा साकारली होती. मालिकेनं शेअर केलेल्या प्रोमोत अग्निहोत्र्यांचा वाडा, गणपतीचं मंदिर आणि मंदिरासमोर बसलेले महादेव अग्निहोत्री यांची एक झलक पाहायला मिळतेय. 'अग्निहोत्र-२'मध्ये सप्तमातृकांचे रहस्य उलगडणार आहे. याआधीच्या पर्वात आठ गणपतींचे रहस्य होते. नुकतीच मालिकेच्या चित्रीकरणाला सुरूवात झाली आहे. पण, मालिका कधी प्रसारित होणार हे मात्र अद्याप कळलेलं नाही.
'अग्निहोत्र' मालिकेच्या पहिल्या पर्वाप्रमाणेच याही पर्वाची कथा श्रीरंग गोडबोले यांची असून भीमराव मुडे दिग्दर्शन करणार आहेत. '१० वर्षांचा काळ लोटला तरी अद्यापही 'अग्निहोत्र' ही मालिका प्रेक्षकांच्या स्मरणात आहे. प्रेक्षकांच्या प्रेमापोटीच पुन्हा या मालिकेच्या निर्मितीचा विचार आम्ही केला. अभ्यासपूर्ण लेखन आणि दिग्दर्शनाची जोड देऊन एक उत्तम कलाकृती आम्ही घेऊन आलो आहोत. 'असं स्टार प्रवाहचे कार्यक्रम प्रमुख सतीश राजवाडेंनी सांगितलं.
शरद पोंक्षेंनी कर्करोगावर यशस्वीपणे मात करत पुन्हा कलाविश्वात पुनरागमन केलंय. गेल्या डिसेंबरपासून ते कर्करोगावर उपचार घेत होते. औषधोपचार आणि किमोथेरपीनं त्यांनी कर्करोगावर मात केली आहे. सध्या ते 'हिमालयाची सावली' या नाटकात काम करताहेत. ज्येष्ठ नाटककार वसंत कानेटकर यांच्या 'हिमालयाची सावली' नाटकात डॉ. श्रीराम लागू यांनी गाजवलेली नानासाहेबांची भूमिका अभिनेते शरद पोंक्षेंनी साकारली आहे.