हिना खान दिसणार बिग बॉसच्या घरात

    दिनांक :07-Oct-2019
मुंबई,
'बिग बॉस ११' चे पर्व जरी मराठमोळी अभिनेत्री शिल्पा शिंदे जिंकली असली तरी तिला तगडं आव्हान दिलं ते अभिनेत्री हीना खाननं. हिनाच्या चाहत्यांसाठी एक आनंदाची बातमी आहे. नुकत्याच सुरू झालेल्या बिग बॉस हिंदीच्या १३ व्या पर्वात हीना पुन्हा एकदा घरात एन्ट्री घेणार आहे.

हीनाच्या घरात होणाऱ्या एन्ट्रीमुळे बिग बॉसच्या घरात एक नवा ट्विस्ट येणार आहे. इतकंच नव्हे तर तिच्या एन्ट्रीनंतर तिने घरातील सदस्यांना दिलेल्या टास्कमुळे अनेक जण भावुकही होणार आहेत. हीना घरात येताना या पर्वातील सदस्यांसाठी एक खास भेट घेऊन आली आहे. ही भेट दुसरी-तिसरी काही नसून या स्पर्धकांच्या कुटुंबातील सदस्यांनी लिहिलेली पत्र आहेत. परंतु, इतक्या सहजासहजी टास्क पूर्ण झालं तर ते बिग बॉस कसलं? त्यामुळे हीनानं या सदस्यांना दोन पर्याय दिले आहेत. घरातील शिधा संपत आला असताना घरासाठी भाजी,फळ, मसाले असा शिधा निवडणे हा एक पर्याय किंवा भाजी नाकारत कुटुंबातील सदस्यांनी लिहिलेली पत्र निवडणे हा दुसरा पर्याय. त्यामुळे घरातील सदस्यांसाठी हा अतिशय अवघड निर्णय असणार आहे हे नक्की.
 
 
सलमान खान या एपिसोडच्या सुरुवातीलाच घरात एक सुपरमार्केट उघडलं असल्याचं घोषित करतो. शिवाय, या सुपरमार्केटची मॅनेजर हीना खान असणार आहे असंही सांगतो. हीनाने घरात प्रवेश केल्यावर ती प्रत्येक सदस्याला स्टोअर रूममधील सुपरमार्केटमध्ये बोलावते आणि घरातील शिधा भरण्यासाठी पदार्थ किंवा आई, भाऊ, मैत्रीणीनं पाठवलेला संदेश असा पर्याय देते. त्यामुळे या टास्कमध्ये सदस्य पोटाची भूक आणि घरच्यांची पत्र यांच्यापैकी काय निवडणार हे पाहणं उत्सुकतेचं ठरणार आहे.
अभिनेत्री हीना खान या पर्वात सहभागी होणार नाहीए...ती सध्या तिच्या चित्रपटाच्या चित्रीकरणात व्यग्र आहे. 'ये रिश्ता क्या कहलाता है' ,'कसोटी जिंदगी की २' या लोकप्रिय मालिकेतून घराघरात पोहोचलेली अभिनेत्री हीना खान आता बॉलिवूडमध्ये पदार्पण करणार आहे. हीना लवकरच एका हिंदी चित्रपटात झळकणार आहे. बॉलिवूडमधील पदार्पणाच्या या वृत्ताला खुद्द हीनाने दुजोरा दिलाय, 'होय, मी चित्रपटात काम करते आहे. या नव्या माध्यमात काम करण्यास मी खूप उत्साही आहे ' असे हीनाने सांगितले. चित्रपटातील भूमिकेसाठी हीना बाइक चालवायला देखील शिकली आहे.