केंद्रीय कर्मचाऱ्यांच्या महागाई भत्तेवाढीमुळे शेअर बाजारात झळाळी

    दिनांक :09-Oct-2019
मुंबई,
महागाई भत्त्यात पाच टक्क्यांची वाढ करण्याचा निर्णय घेऊन सरकारनं केंद्रीय कर्मचाऱ्यांना दिवाळी भेट दिली असतानाच, या निर्णयामुळं शेअर बाजारात झळाळी आल्याचे पाहायला मिळाले. सेन्सेक्स ६४६ अंकांनी वधारला असून, ३८,१७८ अंकांवर बंद झाला. तर निफ्टीही १८७ अंकांची वाढ नोंदवून ११, ३१३वर स्थिरावला.

 
महागाई भत्त्यात पाच टक्क्यांची वाढ करण्याचा निर्णय घेऊन केंद्र सरकारनं केंद्राच्या कर्मचाऱ्यांना दिवाळीची भेट दिली. केंद्र सरकारच्या या निर्णयाचा चांगला परिणाम शेअर बाजारावरही झाला. मुंबई शेअर बाजाराचा (बीएसई) ६४५.९७ अंकांनी वधारून ३८, १७७. ९५ अंकांवर बंद झाला. तर राष्ट्रीय शेअर बाजाराचा निर्देशांक (निफ्टी) १८६.९० अंकांनी वधारून ११,३१३.३० अंकांवर स्थिरावला. बँकिंग आणि ऑटो क्षेत्रात अधिक तेजी पाहायला मिळाली. इंडसलँड बँक, भारती एअरटेल, स्टेट बँक ऑफ इंडिया, आयसीआयसीआय बँक, महिंद्रा अँड महिंद्रा आणि टाटा स्टील यांच्या समभागांमध्ये ५.७२ टक्क्यांची वाढ नोंदवली गेली.
तत्पूर्वी, आठवड्याच्या व्यवहाराच्या दुसऱ्या दिवशी शेअर बाजारात सुरुवातीला सुस्ती आल्याचं चित्र होतं. दिवसाच्या शेवटच्या सत्रात बाजारात जबरदस्त तेजी पाहायला मिळाली. केंद्र सरकारी कर्मचाऱ्यांच्या महागाई भत्त्यात वाढ करण्याचा केंद्र सरकारनं निर्णय घेतल्यानंतर शेअर बाजारात तेजी वाढली.
दरम्यान, देशांतर्गत शेअर बाजारात सोमवारी सलग सहाव्या सत्रांत घसरण नोंदवण्यात आली होती. मुंबई शेअर बाजाराचा निर्देशांक (सेन्सेक्स) १४१.३३ अंकांनी घसरून ३७,५३१.९८च्या पातळीवर बंद झाला होता. तर राष्ट्रीय शेअर बाजाराचा निर्देशांक (निफ्टी) ४८.३५ अंकांच्या घसरणीसह ११,१२६.४०च्या पातळीवर बंद झाला होता. आयटीसी, टीसीएस, एल अँड टी, एचडीएफसी, एचडीएफसी बँक आणि इन्फोसिस सारख्या हेवीवेट कंपन्यांच्या समभागांची मोठ्या प्रमाणावर विक्री झाल्याने गुंतवणूकदारांनी प्रॉफिट बुक केल्याचे आढळून आले होते. सलग सहा सत्रांमध्ये 'सेन्सेक्स' १४५७.७६ अंकांनी कोसळला होता. 'सेन्सेक्स'मध्ये सर्वाधिक फटका टाटा मोटर्सला (२.४९ टक्के) बसला होता. दरम्यान, मंगळवारी दसऱ्यानिमित्त शेअर बाजार बंद होता.