'तान्हाजी : द अनसंग वॉरियर' चं नव पोस्टर प्रदर्शित

    दिनांक :12-Nov-2019
|
मुंबई,
हिंदवी स्वराज्याच्या लढ्यातील 'सिंह' नरवीर तानाजी मालुसरे यांचा पराक्रम सांगणारा 'तान्हाजी : द अनसंग वॉरियर' चित्रपटाचं नवं पोस्टर प्रदर्शित करण्यात आलं आहे. या चित्रपटात अभिनेता अजय देवगण तानाजींच्या भूमिकेत दिसणार आहे. तर, ओम राऊतनं या चित्रपटाच्या दिग्दर्शनाचं आव्हान पेललं आहे.

 
'स्वराज से बढकर क्या?' असा प्रश्न विचारत करारी मुद्रेने पाहत उभा असलेला तानाजी पोस्टरमध्ये दिसत आहे. 'तलवारीइतकीच तीक्ष्ण बुद्धिमत्ता' असलेला असं म्हणत अजयनं यापूर्वीही चित्रपटाचे एक पोस्टर शेअर केले होते. अजय देवगणबरोबरच अभिनेता सैफ अली खान चित्रपटात महत्त्वाच्या भूमिकेत दिसणार आहे. सैफ उदयभान राठोड यांची भूमिका साकारणार आहे. सैफच्या चित्रपटातील लूकचंही पोस्टर लाँच करण्यात आलं आहे. या पोस्टरमध्ये सैफच्या भूमिकेची एक झलक पाहायला मिळतेय. मराठमोळा अभिनेता अजिंक्य देव हा सुद्धा चित्रपटात झळकणार आहे. मात्र, त्याची भूमिका कोणती हे मात्र गुलदस्त्यात आहे.
 
कोंढाणा किल्ला सर करण्याची जबाबदारी महाराजांनी आपल्यावर सोपवल्याचं कळताच, मुलाचं लग्न बाजूला ठेवून तानाजी मालुसरे सज्ज झाले होते. 'आधी लगीन कोंढाण्याचं, मग माझ्या रायबाचं' अशी गर्जना करत ते मोहीम फत्ते करण्यासाठी गेले होते. त्याच्या अतुलनीय पराक्रमामुळे मावळ्यांनी किल्ला जिंकलासुद्धा; पण शत्रूशी बेभान होऊन लढताना हा सिंह धारातीर्थी पडला होता. त्यांच्याच स्मृतिप्रित्यर्थ कोंढाणा किल्ल्याचं नाव सिंहगड असं ठेवण्यात आलंय. लढवय्या तानाजींची ही वीरगाथा ७० एमएम पडद्यावर पाहणं हा नक्कीच विलक्षण अनुभव असेल.
आगामी ' तानाजी: द अनसंग वॉरियर' मध्ये सुपरस्टार अजय देवगनसोबत अभिनेता शरद केळकर दिसणार आहे. शरद म्हणतो अजय देवगन त्याला त्याच्या मोठ्या भावासारखा आहे. शरद अजयसोबत या सिनेमाच्या निमित्ताने चौथ्यांदा काम करत आहे.
शरद म्हणतो, 'अजयसोबत मी एक टीव्ही शो, बादशाहो सिनेमा आणि 'गेस्ट इन लंडन' मध्ये काम केलंय. अजय देवगन एक महान अभिनेता आहे. त्याच्याकडून खूप काही शिकण्यासारखं आहे. तो एकदम फोकस्ड अभिनेता आहे. 'तानाजी...'सारखा सिनेमा मी पहिल्यांदाच करतोय. हा सिनेमा पूर्णपणे स्टुडिओत शूट केला आहे. तो थ्रीडी सिनेमा आहे.' या सिनेमात अभिनेत्री काजोलदेखील आहे. हा सिनेमा १७ व्या शतकातला आहे. या सिनेमाचं दिग्दर्शन ओम राऊतने केलं आहे.