इंदूर कसोटी: भारताने बांगलादेशचा पहिला डाव १५० धावात गुंडाळला

    दिनांक :14-Nov-2019
|
इंदूर,
भारतीय गोलंदाजाच्या भेदक माऱ्यापुढं सुरुवातीपासूच चाचपडणाऱ्या बांगलादेश संघाचा पहिला डाव अवघ्या १५० धावांत आटोपला आहे. नाणेफेक जिंकून प्रथम फलंदाजी करण्याचा बांगलादेशनं घेतलेला निर्णय त्यांच्यासाठी फारसा उपयुक्त ठरला नाही. भारतीय गोलंदाजांनी टिच्चून मारा करत पाहुण्या संघाला अवघ्या ५८.३ षटकांत गुंडाळले.

 
 
प्रथम फलंदाजी करणाऱ्या बांगलादेशच्या डावाची सुरुवातच अडखळत झाली. त्यांचे दोन्ही सलामीवीर प्रत्येकी सहा धावा काढून तंबूत परतले. कर्णधार मोमीनूल हक आणि मुशफिकूर रहीम यांनी डाव सावरण्याचा प्रयत्न केला. मात्र, त्यांची झुंज अपेशी ठरली. हक ३७ धावांवर तंबूत परतला तर, मुशफिकूरला मोहम्मद शमीने ४३ धावांवर टिपले. अन्य फलंदाजही ठराविक अंतरानं बाद होत गेले. मधल्या फळीतील मोहम्मद मिथुन यानं १३, महमुदुल्लाहनं १० तर लितॉन दास यानं २१ धावा केल्या. बांगलादेशचा एकही फलंदाज ५० धावांपर्यंत मजल मारू शकला नाही. विशेष म्हणजे, तब्बल सहा फलंदाजांना दोन आकडी धावसंख्याही उभारता आली नाही.
भारताकडून मोहम्मद शमी यानं तीन गडी बाद केले. इशांत शर्मा, उमेश यादव व रविचंद्रन अश्विन यांनी प्रत्येकी दोन फलंदाजांना तंबूचा रस्ता दाखवला. तर, एक जण धावबाद झाला.
वर्ल्ड टेस्ट चॅम्पियनशीपमध्ये एकही सामना न गमावलेल्या भारतीय संघानं आतापर्यंत दोन मालिका खेळल्या आहेत. भारतानं वेस्ट इंडिजला २-० ने तर दक्षिण आफ्रिकेला ३-० ने धूळ चारली आहे.