सर्वांच्या प्रार्थनेमुळे लतादीदींच्या प्रकृतीत सुधारणा; कुटुंबीयांनी मानले आभार

    दिनांक :15-Nov-2019
|
मुंबई,
गानसम्राज्ञी लता मंगेशकर यांच्या प्रकृतीमध्ये आता थोडी सुधारणा होत असल्याचे मंगेशकर कुटुंबीयांनी शुक्रवारी स्पष्ट केले. 'लतादीदींच्या तब्येतीत लवकर सुधारणा व्हावी यासाठी सर्वच जण प्रार्थना करत आहेत, आपणा सर्वांच्या प्रार्थनेमुळे लतादीदींच्या प्रकृतीत सुधारणा होत आहे.' अशी माहिती त्यांच्या कुटुंबाने प्रसारमाध्यांना दिली आहे.

 
लतादीदींच्या प्रकृतीसंदर्भात सध्या सोशल मीडिया तसेच अन्य ठिकाणी अफवा पसरवल्या जात आहेत. मात्र, त्यावर विश्वास ठेवू नये, असे आवाहन रुग्णालय प्रशासन आणि कुटुंबीयांकडून करण्यात आले आहे. श्वसनक्रियेत त्रास होत असल्याने लतादीदींना ब्रीच कॅण्डी रुग्णालयात दाखल करण्यात आले आहे. त्या सध्या व्हेंटिलेटरवर आहेत. परंतु आता त्यांच्या प्रकृतीत सुधारणा होत आहे. यासंदर्भात अधिक माहिती देता येणार नाही, असेही रुग्णालय प्रशासनाने स्पष्ट केले.
 
 
लता मंगेशकर यांच्या ट्वीटर अकाउंटवरूनही यासंदर्भातील ट्वीट करण्यात आलं आहे. ९० वर्षीय लता मंगेशकर यांचा श्वासोच्छवास घेण्यात त्रास होत होता, म्हणून त्यांना ब्रीच कँडी रुग्णालयात दाखल करण्यात आले. त्यांची प्रकृती आता स्थिर आहे. त्यांना न्युमोनिया आणि चेस्ट इन्फेक्शन झालं होतं. त्यांच्या प्रवक्त्याकडून स्टेटमेंट आलं की, 'लता दीदी स्टेबल आहेत. आणि हळू हळू उपचारांना प्रतिसाद देत आहेत. आम्ही त्यांना घरी घेऊन जाण्यात तयार आहोत. तुमचे आशीर्वाद आणि आधारासाठी धन्यवाद.'