नुकसानग्रस्त शेतकऱ्यांना आर्थिक मदत जाहीर

    दिनांक :16-Nov-2019
मुंबई,
अवकाळी पावसाने हातातोंडाशी आलेला घास हिरावून घेतलेल्या पीडित शेतकऱ्यांसाठी दिलासादायक बातमी आहे. राज्यपाल भगत सिंह कोश्यारी यांनी ऑक्टोबर आणि नोव्हेंबर महिन्यात अवकाळी पावसाने झालेल्या नुकसानीचा आढावा घेत आर्थिक मदत जाहीर केली आहे. खरीप पिकांसाठी ८००० रुपये प्रति हेक्टर (अडीच एकर) आणि बारामाही पिकांसाठी १८ हजार रुपये मदत देण्यात येणार आहे.

 
 
बारामाही पिकांमध्ये फळबागांसह विविध पिकांचा समावेश होतो. अवकाळी पावसामुळे या पिकांचं मोठ्या प्रमाणात नुकसान झालं होतं. सुरुवातीला पावसाने दडी मारली आणि नंतर अतिवृष्टी झाली. त्यामुळे जे काही पीक आलं होतं, ते सर्व गमावण्याची वेळ शेतकऱ्यांवर आली. या मदतीसह नुकसानग्रस्त भागातील शेतकऱ्यांच्या मुलांना परीक्षा शुल्क माफ करण्यात आलं आहे. महाविद्यालये आणि शाळांमध्ये द्यावी लागणारी फी यामुळे माफ केली जाईल. जाहीर केलेली मदत तातडीने शेतकऱ्यांपर्यंत पोहोचावी यासाठी प्रशासनाला आदेशही देण्यात आले आहेत.
राज्यात सध्या राष्ट्रपती राजवट लागू असल्याने राज्यपाल कार्यभार सांभाळत आहेत. राज्याच्या मुख्य सचिवांच्या निगराणीत शेतकऱ्यांपर्यंत ही मदत पोहोचवली जाणार आहे. यापूर्वी विविध राजकीय पक्षाच्या नेत्यांनी नुकसानग्रस्त भागाचा आढावा घेऊन मदत जाहीर करण्याची मागणी केली होती.
शिवसेना पक्षप्रमुख उद्धव ठाकरे यांच्यासह राष्ट्रवादी काँग्रेसचे अध्यक्ष शरद पवारही शेतकऱ्याच्या बांधावर जाऊन नुकसानग्रस्त भागाची पाहणी करत आहेत. खचून गेलेल्या शेतकऱ्यांना या नेत्यांनी धीर देण्याचा प्रयत्न केला. दिल्लीला गेल्यानंतर कृषी मंत्र्यांच्या कानावर ही गोष्ट घालणार असल्याचं शरद पवार म्हणाले होते, जेणेकरुन केंद्र सरकारकडूनही शेतकऱ्यांसाठी मदत प्राप्त होईल.
'मीट द प्रेस'मध्ये पवार म्हणाले, अवकाळी पावसाने शेतकऱ्यांचे अभूतपूर्व नुकसान झाले आहे. कापूस, धान, सोयाबीन, संत्री आणि भाजीपाला शेतकऱ्यांच्या हातातून गेला. त्यांच्या डोक्यावर आधीच कर्जाचा भार आहे. त्यांना तातडीने मदत करणे गरजेचे आहे. नेमका किती निधी लागेल हे आताच सांगता येणार नाही. नुकसान भरपाईसाठी ३३ टक्केच्या वर नुकसानीचा सर्वे करणे योग्य नाही. प्रशासनाने सरसकट पंचनामे करावे, यासाठी आग्रही भूमिका घेण्यात येईल.'