पहिल्या डे-नाइट कसोटीत सोन्याच्या नाण्याने होणार टॉस

    दिनांक :06-Nov-2019
|
कोलकाता,
भारत आणि बांगलादेशदरम्यान २२ नोव्हेंबर रोजी पहिला दिवसरात्र कसोटी सामना येथील ईडन गार्डन मैदानावर होत असून या ऐतिहासिक सामन्यासाठी सर्व यंत्रणा सज्ज झाल्या आहेत. भारतीय क्रिकेट नियामक मंडळाचे नवनियुक्त अध्यक्ष सौरव गांगुली या सामन्याचं नियोजन पाहत आहेत. या सामन्याचं खास वैशिष्ट्य म्हणजे सामन्याची नाणेफेक सोन्याच्या नाण्याने केली जाणार आहे तर सामन्याला उपस्थित राहणाऱ्या मान्यवरांना चांदीचं नाणं आठवण म्हणून भेट दिलं जाणार आहे.

 
 
सामना पाहण्यासाठी अनेक दिग्गजांना निमंत्रित करण्यात आलं असून त्यात बांगलादेशच्या पंतप्रधान शेख हसीना यांचाही समावेश आहे. सौरव गांगुली यांनी शेख हसीना यांना सामन्यासाठी विशेष अतिथी म्हणून निमंत्रित केलं असून हे आमंत्रण हसीना यांनी स्वीकारलं आहे. बंगाल क्रिकेट असोसिएशनने हसीन यांच्या स्वागताची जंगी तयारी केली आहे.
हसीना यांच्यासाठी खास बंगाली पद्धतीच्या मेन्यूचा बेत आखण्यात आला आहे. दुपारच्या जेवणात प्रसिद्ध हिल्सा, दाब चिंग्री, पाब्डा, भेटकी या माशांचा प्रामुख्याने समावेश असेल. याशिवाय पारंपरिक बंगाली पद्धतीचे पदार्थही जेवणात असणार आहेत. त्यात शुक्तो, बटाटा पोस्तो, रोस्टेड कॉलीफ्लॉवर, चनार डालना, पुलाव चटनी या खमंग पदार्थांची रेलचेल असणार आहे. चिकन आणि मटणाच्या विविध डिशेसही जेवणात ठेवण्यात येणार आहेत. बंगाल क्रिकेट असोसिएशन एका पंचतारांकित हॉटेलच्या साह्याने या ग्रँड रिसेप्शनची तयारी करत आहे. सूत्रांच्या म्हणण्यानुसार, हसीना यांना याप्रसंगी एक खास साडीही भेट म्हणून दिली जाणार आहे.
 
 
पंतप्रधान नरेंद्र मोदी यांनाही या ऐतिहासिक कसोटी सामन्याचे आमंत्रण देण्यात आले आहे. याशिवाय भारतीय कसोटी संघाचे कर्णधारपद भुषविलेल्या अनेक दिग्गज क्रिकेटपटूंना या मॅचसाठी निमंत्रित करण्यात आलं आहे. येत्या २२ नोव्हेंबरपासून कोलकाता येथील ईडन गार्डन मैदानावर हा सामना खेळवला जाणार आहे. भारताचा हा पहिलाच दिवसरात्र कसोटी सामना असणार आहे.