मुंबईत धावणार सायकल अॅम्ब्युलन्स
स्रोत: Tarun Bharat, Nagpur   दिनांक :03-Feb-2019
 
 

 
 
 
 
 
मुंबईत अत्यंत दाटीवाटीच्या भागात, वाहतुकीच्या कोंडीतून अॅम्ब्युलन्स पोहोचण्यात येणाऱ्या अडचणी लक्षात घेऊन आरोग्य विभागाने काही महिन्यांपूर्वी बाइक अॅम्ब्युलन्स सेवा सुरू केली होती. बाइक अॅम्ब्युलन्सची योजना यशस्वी झाल्यानंतर आता मुंबईत प्रयोगिक तत्त्वावर सायकल अॅम्ब्युलन्स सेवा सुरू होणार आहे. त्यासाठी मुंबईतील अंधेरी, विलेपार्ले आणि शिवाजी पार्क परिसरात २० सायकल अॅम्ब्युलन्स उपलब्ध करून देण्यास सार्वजनिक आरोग्य विभागाने मान्यता दिली आहे. सायकल अॅम्ब्युलन्सच्या माध्यमातून दाटीवाटीच्या परिसरात राहणाऱ्या रुग्णांवर प्राथमिक उपचार आणि गरज भासल्यास त्यांना रुग्णालयात दाखल करण्याचे काम होणार आहे. 
 
 
 पॅरामेडिकच्या माध्यमातून ही योजना करण्यात येणार आहे.  सायकल अॅम्ब्युलन्ससाठी नियुक्त केल्या जाणाऱ्या संबंधिताकडे स्वत:चा मोबाइल असेल आणि तो १०८ या क्रमांकाशी जोडण्यात येईल. १०८ क्रमांकाच्या माध्यमातून कॉल आल्यानंतर संबंधित रुग्णाच्या घरी जाऊन आजाराच्या तीव्रतेप्रमाणे प्राथमिक स्वरूपाचे उपचार करण्यात येईल.  सायकल अॅम्ब्युलन्समध्ये वयोवृद्ध रुग्णांसाठी किमान आवश्यक असणारी औषधे तसेच उपकरणे ठेवली जातील. गंभीर स्वरूपाचा आजार असल्यास १०८ क्रमांकाच्या सेवेची रुग्णवाहिका बोलावून रुग्णाला नजीकच्या मोठ्या रुग्णालयात दाखल केले जाईल.
 
 
सायकल अॅम्ब्युलन्सवर बसविण्यात येणाऱ्या पेटीत औषधांसह स्टेथोस्कोप, रक्तदाब तपासणी उपकरण, ग्लुकोमीटर, तापमापक, सिरिंज, कॉटन बँडेज आदी साहित्य असेल. सायकल अॅम्ब्युलन्सची किंमत, जीपीएस यंत्रणा, वैद्यकीय उपकरणे, सायकलची देखभाल दुरुस्ती तसेच मनुष्यबळ यामुळे योजनेवर वर्षाला ३३ लाख रुपयांचा खर्च अपेक्षित आहे.