दुष्काळग्रस्तांसाठी निधीचा १४५० कोटींचा पहिला हप्ता वितरित
स्रोत: Tarun Bharat, Nagpur   दिनांक :05-Feb-2019
मुंबई :
महाराष्ट्रातील दुष्काळग्रस्त भागात नुकसान भरपाईपोटी मदतनिधीचा पहिला हप्ता वितरित करण्यात आला आहे. लाभार्थी शेतकऱ्यांच्या थेट बँक खात्यात हा निधी तातडीने जमा करण्याचे निर्देश मुख्य सचिव दिनेश कुमार जैन यांनी दिले आहेत.
राज्यात दुष्काळग्रस्त भागामध्ये मदत निधीचे वाटप सुरु करण्यात आले असून त्यासाठी १ हजार ४५० कोटी रुपयांचा पहिला हप्ता सर्व विभागीय आयुक्तांना वितरित करण्यात आला आहे. त्यांच्या माध्यमातून जिल्हाधिकाऱ्यांना आणि तेथून संबंधित तालुक्यांच्या तहसिलदारांना हा निधी वर्ग केला जाईल.

 
त्यांच्या माध्यमातून दुष्काळग्रस्त गावांतील शेतकऱ्यांच्या थेट खात्यात हा निधी वितरित केला जाईल. यासाठी बहुतांश जिल्ह्यांमध्ये गावनिहाय याद्या तयार करण्याचे काम अंतिम टप्प्यात आहे. तर काही जिल्ह्यांनी याद्या पूर्ण झालेल्या गावांमध्ये निधीदेखील वितरित केला आहे.
दुष्काळ मदतनिधीचे वितरण तातडीने व्हावे यासाठी जिल्हाधिकाऱ्यांनी विशेष लक्ष द्यावे, असे निर्देश मुख्य सचिवांनी दिले. याद्या तयार करण्याचे काम तातडीने पूर्ण करुन तातडीने निधी लाभार्थ्यांच्या खात्यात जमा करावा, असंही मुख्य सचिवांनी सांगितले. यावेळी प्रधानमंत्री कृषी सन्मान योजनेच्या कामाचा आढावा देखील मुख्य सचिवांनी घेतला.