मेट्रोमध्ये खाण्यापिण्यावर बंदी
   दिनांक :02-Mar-2019
मुंबई
मेट्रोमध्ये प्रवास करताना खाद्यपदार्थांचा आस्वाद घेत असाल तर आता थांबा. …यापुढे मेट्रोने प्रवास करताना खाद्यपदार्थ किंवा पेयपान करता येणार नाही. काही खायचे असेल तर ते स्थानकांवरील फूड स्टॉलवर खा आणि मगच मेट्रोत प्रवेश करा, असे मुंबई मेट्रो १ ने स्पष्ट केले आहे. प्रवाशांकडून स्वच्छता राखली जावी, मेट्रो ट्रेन चकाचक रहावी, हा यामागचा दृष्टिकोन आहे. मेट्रोमध्ये खाद्यपदार्थ खाल्ल्यास ५०० रुपये दंड आकारला जाईल.

 
 
घाटकोपर वर्सोवा मेट्रो मार्गावर मेट्रोत स्वच्छता राखण्यासाठी १३ मार्चपर्यंत स्वच्छता मोहीम राबवण्यात येणार आहे. २७ फेब्रुवारीपासून या मोहिमेला सुरूवात झाली आहे. मेट्रोने प्रवास करताना ट्रेनमध्ये प्रवेश केल्यानंतर काही प्रवासी खाद्य पदार्थ खातात, अशा घटना घडल्या आहेत. मेट्रो ही वातानुकुलित असल्याने खाद्यपदार्थांचा वास डब्यात पसरतो, परिणामी इतर प्रवाशांना त्रास होतो, अशा तक्रारी होत्या. त्यामुळे मेट्रो कंपनीने हा निर्णय घेतला आहे.
स्वच्छता राखण्यासाठी ट्रेनमध्ये खाद्यपदार्थ खाणाऱ्या प्रवाशास अन्य प्रवाशांनी रोखावे तसेच हाऊस कीपिंग टीमलाही लक्ष ठेवण्यास सांगण्यात आले आहे.
मध्यंतरी एक प्रवासी मेट्रोने मासे घेऊन जात असताना त्यास सुरक्षा रक्षकांनी मज्जाव केल्याची घटना घडली होती. त्यावरून वादंग झाला होता. तयार पदार्थांची ने-आण करता येऊ शकते. परंतु मासे किंवा मटन नेता येणार नाही, असे मेट्रोने स्पष्ट केले होते. वातानुकुलित मेट्रोत दुर्गंधी पसरू नये म्हणून कच्च्या मांसाहारी पदार्थांची ने-आण करण्यास बंदी आहे. मेट्रोने प्रवास करण्याची मागणी डबेवाल्यांनीही केली होती. मात्र हीही मागणी नाकारण्यात आली होती