पाकिस्तानात दोन हिंदू मुलींचे अपहरण; सोशल मीडियावर व्हिडियो व्हायरल
   दिनांक :24-Mar-2019
पाकिस्तानच्या सिंध भागात होळी सणाच्या पूर्वसंध्येला दोन अल्पवयीन हिंदू मुलीचे अपहरण करण्यात आले असून त्यांना जबरदस्तीने इस्लाम धर्म स्वीकारण्यास भाग पाडल्याची घटना घडली आहे. या घटनेची परराष्ट्र मंत्रालयाने गंभीर दखल घेतली आहे. परराष्ट्र मंत्री सुषमा स्वराज यांनी भारतीय उच्च आयुक्तांना यासंबंधी रिपोर्ट देण्यास सांगितले आहे.
 
होळीच्या पूर्वसंध्येला हिंदू कुटुंबातील रवीना (वय १३) आणि रिना (वय १५) या दोन अल्पवयीन मुलीचे त्यांच्या घरातून अपहरण करण्यात आले. घोटकी जिल्ह्यात हा प्रकार उघडकीस आल्यानंतर अपहरण करण्यात आल्याचा व्हिडिओ सोशल मीडियावर व्हायरल झाला आहे. अपहरणानंतर त्यांचे धर्मांतर करण्यात आले असून त्यांचे बळजबरीने लग्न (निकाह) केले आहे. मी या घटनेसंबंधी भारतीय उच्च आयोगाकडे रिपोर्ट मागितला आहे, असे सुषमा स्वराज यांनी आपल्या ट्विटमध्ये म्हटले आहे. सिंध प्रांतात ही घटना उघडकीस आल्यानंतर अल्पसंख्याकांनी जोरदार आंदोलन केले आहे. ही घटना घडल्यानंतरही पोलिसांनी जाणीवपूर्वक गुन्हा दाखल केला नाही, असा आंदोलनकर्त्यांनी आरोप केला आहे. अपहरणाच्याविरोधात आंदोलन केल्यानंतर पोलिसांनी याप्रकरणी गुन्हा दाखल केला आहे, असे हिंदू सेवा वेलफेअर ट्रस्टने म्हटले आहे.