पाकमध्ये हिंदू मुलींचे सक्तीने धर्मांतर, एकाला अटक
   दिनांक :25-Mar-2019
पाकिस्तान,
दोन अल्पवयीन हिंदू मुलींचे अपहरण करून इच्छेविरोधात धर्मांतर करवून विवाह केल्याप्रकरणी मुलीचे अपहरण करणाच्या कामात साहाय्य करणाऱ्यास अटक करण्यात आली आहे. परराष्ट्र मंत्री सुषमा स्वराज यांनी या घटनेची गंभीर दखल घेतल्यानंतर या प्रकरणी पाक प्रशासनावर दबाव निर्माण झाला होता. दरम्यान पंतप्रधान इम्रान खान यांनी याप्रकरणी चौकशी करण्याचे आदेशही दिले होते.
 
रीना आणि रविना या दोघीही सिंधमधील घोटकीच्या रहिवाशी आहेत. होळीच्या संध्याकाळी काही प्रभावशाली लोकांनी अपहरण करून त्यांचे सक्तीने धर्मांतर केले. धर्मांतर केल्यानंतर त्यांचे दोन मुस्लिम तरुणांशी लग्नही लावून देण्यात आले. पाकिस्तानमध्ये बालविवाह हा गुन्हा मानला जातो. अल्पसंख्यांकासाठी काम करणाऱ्या एम. जिब्रान नासिर या कार्यकर्त्याने या घटनेवर प्रकाश टाकला होता.
धर्मांतर आणि लग्नाचे व्हिडिओही सोशल मीडियावर व्हायरल झाले असून संपूर्ण पाकिस्तानातून त्यांच्यावर टीका होत आहे. भारताच्या परराष्ट्र मंत्री सुषमा स्वराज यांनी देखील पाकिस्तानचे परराष्ट्र उच्चायुक्त फवाद चौधरी यांना याप्रकरणी जाब विचारला आहे. पाकिस्तानातील हिंदू समाजानेही या घटनेविरोधात निदर्शने केली. हिंदूंच्या सुरक्षेच्या आश्वासनाचे काय झाले, असा सवालही त्यांनी इम्रान खान सरकारला विचारला. यानंतर अखेर पोलिसांनी धर्मांतर करणाऱ्या मौलवीला आणि त्याच्या साहाय्यकला अटक केली आहे. दोन्ही मुलींनी पंजाब उच्च न्यायालयात तक्रारही दाखल केली आहे.
पाकिस्तानातील हिंदूंची लोकसंख्या ७५ लाख इतकी आहे. यातील बहुतांशी हिंदू समाज सिंध प्रांतात राहतो. उमरकोट जिल्ह्यात दर महिन्याला २५ हिंदू मुलींचे अपहरण करून सक्तीने धर्मांतर करण्यात येत असल्याची धक्कादायक माहितीही समोर आली आहे.