भाजपमध्ये जाणार नाही, पण शुक्रवारी निर्णय जाहीर करणार : सत्तार
   दिनांक :26-Mar-2019
 
 
मुख्यमंत्री देवेंद्र फडणवीस यांची भेट घेतली असली तरी भाजपमध्ये जाण्याचा माझा कोणताही विचार नाही, असं सांगतानाच येत्या शुक्रवारी होणार्‍या कार्यकर्त्यांच्या मेळाव्यात पुढील निर्णय घेण्यात येईल, असं कॉंग्रेसचे बंडखोर नेते अब्दुल सत्तार यांनी आज स्पष्ट केलं.
 

 
 
प्रसारमाध्यमांशी बोलताना अब्दुल सत्तार यांनी त्यांची भूमिका स्पष्ट केली. कॉंग्रेसचे प्रदेशाध्यक्ष अशोक चव्हाण हे आपले नेते आहेत. त्यामुळे भाजपमध्ये जाण्याचा प्रश्नच नाही. मात्र येत्या 29 मार्च रोजी मेळावा आयोजित केला असून कार्यकर्त्यांशी संवाद साधून पुढचा निर्णय घेतला जाईल, असं सत्तार म्हणाले. दरम्यान, आपल्या बंडानंतर कॉंग्रेसने औरंगाबादची ऑफर दिली होती, असा दावाही त्यांनी केला.
यावेळी त्यांनी मुख्यमंत्री देवेंद्र फडणवीस यांची भेट घेण्यामागचा खुलासाही केला. मुख्यमंत्र्यांनी आपल्या मतदारसंघात विकासकामांसाठी मदत केली होती. त्यामुळे त्यांचे आभार मानण्यासाठीच त्यांची भेट घेतली, असं त्यांनी स्पष्ट केलं. कॉंग्रेसचे विधानसभेतील विरोधी पक्षनेते राधाकृष्ण विखे-पाटील यांची आज नगरला जाऊन भेट घेणार असल्याचंही त्यांनी सांगितलं. सत्तार यांना औरंगाबादमधून लोकसभेचं तिकीट हवं होतं. पण तिकीट मिळालं नसल्याने त्यांनी कॉंग्रेसचा राजीनाम दिला होता. औरंगाबादमध्ये पत्रकार परिषद घेऊन त्यांनी आज आपली भूमिका स्पष्ट केली.