धोनी, कोहली नव्या जर्सीवर खुश
   दिनांक :07-Mar-2019
नवी दिल्ली
टीम इंडियाच्या नव्या जर्सीने भारतीय क्रिकेट संघाचा कर्णधार विराट कोहली आणि यष्टीरक्षक-फलंदाज महेंद्रसिंग धोनी यांची मने जिंकली आहेत. भारतीय क्रिकेट नियामक मंडळाने (बीसीसीआय) विश्वचषक २०१९साठी नवी जर्सी लाँच केली आहे. प्रत्येकाला 'स्लीक लूक' खूपच आवडतो, मात्र मला नव्या जर्सीचा 'लाइट फॅब्रिक' लुक आवडला, असे कोहलीने म्हटले आहे. नवी जर्सी ही जुन्या जर्सीच्या तुलनेत हलकी असल्याचेही कोहली म्हणाला.
 
 
आम्हाला जर्सी स्लीक लुकमध्ये हवी होती हे खरे आहे. आंतरराष्ट्रीय क्रिकेट खेळत असताना तुम्हाला खास दिसावे लागते. एक खेळाडू म्हणून तुमचे किट आणि जर्सी काहीशी वेगळी असायला हवी, असे कोहलीने म्हटले आहे. ही झाली डिझाइनची गोष्ट, मात्र फिट आणि फीलचा विचार करता आम्हाला जर्सी हलकी हवी होती आणि नव्या जर्सीचे फॅब्रिक असेच आहे. त्वचेवर ती अतिशय हलकी जाणवते, असेही कोहली म्हणाला.
धोनीला देखील नवी जर्सी अतिशय कम्फर्टेबर वाटते. नवी जर्सी अतिशय आरामदायक आहे. या जर्सीत टू-टोन कलर आहे. ही जर्सी येणाऱ्या काळाची वाटते, अशा शब्दात धोनीने नव्या जर्सीबाबत आपले मत व्यक्त केले. एक ३८ वर्षीय व्यक्ती हे सांगतो म्हटल्यावर ते गमतीशीर वाटू शकते, मात्र मला तिचे डिझाइन खूपच आवडले आहे. आता पर्यंत आम्ही जे परिधान करत आलो आहोत, त्याहून ही जर्सी वेगळीच आहे, असे धोनी म्हणाला.
 
 
टीम इंडियाच्या नव्या जर्सीत अनेक बदल केले गेले आहेत. कॉलरचा रंग बाहेरून पुन्हा निळा करण्यात आला आहे. जर्सीवर १९८३ चा विश्व चषक, २००७ चा टी-२० विश्व चषक आणि २०११ चा विश्वचषक जिंकल्याच्या तारखा लिहिलेल्या आहेत. जर्सीचा रंग मागील जर्सीच्या तुलनेत अधिक गडद निळा आहे.