सोलापूर विद्यापीठाचे नामकरण वादाच्या भोवऱ्यात
   दिनांक :07-Mar-2019
 
सोलापूर : सोलापूर विद्यापीठाच्या नामांतरणाच्या वादात आता आणखी एक भर पडली आहे. काल गोंधळ आणि कडेकोट पोलीस बंदोबस्तात 'पुण्यश्लोक अहिल्यादेवी सोलापूर विद्यापीठ' असे विद्यापीठाचे नामकरण करण्यात आले. मात्र या नावात अक्षम्य चूक झाली असून ही बाब विद्यापीठाच्या तज्ज्ञांच्या लक्षात कशी आली नाही, असा संतप्त सवाल ज्येष्ठ अभ्यासक वा. ना. उत्पात यांनी केला आहे.  उत्पात यांच्या मते, 'अहिल्या' असा केलेला उल्लेख पूर्ण चुकीचा असून, ऐतिहासिक दस्तावेजात अहल्या असे नाव आहे. अहिल्याचा अर्थ आहि म्हणजे साप आणि ला म्हणजे आणणारी म्हणजेच साप आणणारी असा नावाचा अनर्थ होत असून, खरे नाव 'अहल्या' आहे. याचा अर्थ सूर्यप्रकाश पसरवणारी थोर शक्ती असल्याचे उत्पात यांनी सांगितले. आजवरच्या सर्व ऐतिहासिक दस्तावेजात अहल्या हेच नाव असून, विद्यापीठाने आणि सरकारने असे चुकीचे नाव देत अर्थाचा अनर्थ कसा केला, असा सवाल ही त्यांनी केला.
 

 
 
माधवराव पेशव्यांच्या पत्रात देखील गंगा जल समान मातोश्री पुण्यश्लोकी अहल्याबाई असा उल्लेख आढळतो, अशी माहिती उत्पात यांनी दिली. नामकरणात वापरलेले पुण्यश्लोक हा पुल्लिंगी असून त्याऐवजी पुण्यश्लोकी असायला हवे असे त्यांनी सांगितले. याबाबत आमदार गणपतराव देशमुख आणि अभ्यासक आण्णा डांगे यांच्याशी चर्चा केल्याचे सांगत आतातरी विद्यापीठाने ऐतिहासिक कागदपत्रांचा अभ्यास करून दुरुस्ती करावी, अशी मागणी उत्पात यांनी केली आहे.