जालियनवाला बाग हत्याकांडाला १०० वर्षे पूर्ण; ब्रिटिश उच्चायुक्तांनी वाहिली श्रद्धांजली
   दिनांक :13-Apr-2019
भारताच्या इतिहासातील एक दुःखद घटना जालियनवाला बाग हत्याकांडाला आज १०० वर्षे पूर्ण झाली. ही घटना घडली त्यावेळी जनरल डायरने निरपराध जनतेवर बेछूट गोळीबाराचे आदेश आपल्या सैन्याला दिले होते. या घटनेची ब्रिटन सरकारने औपचारिकरित्या दोन दिवसांपूर्वीच माफी मागितली आहे. दरम्यान, आज या घटनेला १०० वर्षे पूर्ण झाल्यानंतर भारतातील ब्रिटिश उच्चायुक्त डोमिनिक एसक्विथ यांनी अमृतसर येथील जालियनवाला बागमधील स्मारकाला भेट दिली आणि मृतांना श्रद्धांजली वाहिली. तसेच काँग्रेस अध्यक्ष राहुल गांधी यांनी देखील येथे उपस्थिती लावून श्रद्धांजली वाहिली.
 

 
 
 
 
 
जालियनवाला बाग हत्याकांड प्रकरणाला १०० वर्षे पूर्ण झाल्यानिमित्त येथे श्रद्धांजलीच्या कार्यक्रमाचे आयोजन करण्यात आले आहे. या कार्यक्रमाला उपराष्ट्रपती वैंकय्या नायडू, काँग्रेसचे अध्यक्ष राहुल गांधी, पंजाबचे मुख्यमंत्री कॅफ्टन अमरिंदर सिंग आदी उपस्थिती लावली आणि श्रद्धांजली वाहिली. यावेळी विशेष नाणे आणि टपाल तिकीटाचे प्रकाशनही करण्यात आले.
 
 
 
 
 
 
 
अमृतसरच्या जालियनवाला बाग येथे १३ एप्रिल १९१९ रोजी महात्मा गांधींच्या असहकार आंदोलनाला पाठींबा देण्यासाठी हजारो लोक एकत्र जमले होते. ही बाग चारही बाजूने १० फूटी उंच भिंतीने बंदिस्त होती व तिथे येण्याजाण्याचा एकच छोटा मार्ग होता. दरम्यान, ब्रिटिश अधिकारी जनरल डायर याने या बागेच्या मुख्य प्रवेशद्वारावर आपल्या शस्त्रधारी सैनिकांना तैनात करीत घेराबंदी केली होती. त्यानंतर त्याने कुठलाही इशारा न देता आपल्या सैन्याला लोकांवर १० मिनिटे गोळीबार करण्याचे आदेश दिले. अनेकांनी आपला जीव वाचवण्यासाठी त्या बागेतल्या विहिरीत उडी मारली. सलग दहा मिनिटे चाललेल्या या गोळीबारात एकूण सोळाशे पन्नास राउंड फायर करण्यात आले होते . महिला, लहान मुले, वृद्ध अनेकजण यामध्ये मृत्यूमुखी पडले. तर १५०० पेक्षा अधिक जण जखमी झाले होते. मात्र, ब्रिटश सरकार यामध्ये मृत्यू पावलेल्या लोकांची संख्या केवळ ३७९ इतकी तर जखमींची संख्या १२०० इतकी सांगत आहे.
 
१९२० साली जालियनवालामध्ये  भारतीयांनी बाग ट्रस्ट स्थापन केले. पुढे तिथे स्मारक बनवण्यात आले. १३ एप्रिल १९६१ रोजी तत्कालीन राष्ट्रपती डॉ. राजेंद्रप्रसाद यांनी त्याचे उद्घाटन केले. १९९७ साली भारत दौऱ्यावर आलेल्या ब्रिटनच्या राणी एलिज़ाबेथ दुसऱ्या यांनी जालियनवाला बागेला भेट दिली होती. त्यावेळी भारतीयांनी ब्रिटनने या हत्याकांडाबद्द्ल माफी मागावी अशी मागणी केली होती. त्यानंतर २०१३ साली ब्रिटनचे पंतप्रधान डेविड कॅमेरुन यांनीदेखील या ठिकाणी भेट दिली व ही घटना म्हणजे ब्रिटिश इतिहासातील लज्जास्पद घटना असल्याचे वक्तव्य त्यांनी केले होते.