'ही' महिला अंतराळवीर राहणार ३२८ दिवस अंतराळात
   दिनांक :19-Apr-2019
वॉशिंग्टन,
सलग ३२८ दिवस अंतराळात एकाच अवकाशयानात महिला अंतराळवीराने राहण्याचा विक्रम 'नासा'ची अंतराळवीर ख्रिस्तिना कोच करणार आहे. ही सर्व मोहीम नासाने तयार केलेल्या पृथ्वीच्या निम्नकक्षेत स्थित इंटरनॅशनल स्पेस स्टेशन (आयएसएस) येथून पूर्ण केली जाणार आहे. ही माहिती नासातर्फे गुरुवारी देण्यात आली.
 

आयएसएसवरून नासा एकूण तीन मोहिमा राबवणार आहे. त्यासाठीचे वेळापत्रक व अंतराळवीर नुकतेच ठरवण्यात आले. या मोहिमांमध्ये जेसिका मेइर या महिला अंतराळवीराचे पहिले अवकाशयान आणि नासाचे अंतराळवीर अँड्रयू मॉर्गन यांचे अंतराळातील वास्तव्य यांचाही समावेश आहे. यामध्ये सलग ३२८ दिवस अंतराळात एकाच अवकाशयानात राहण्यासाठी ख्रिस्तिना कोचची निवड झाली आहे. ख्रिस्तिना कोच ही महिला अंतराळवीर यावर्षी १४ मार्च रोजी आयएसएसवर दाखल झाली होती. नव्या वेळापत्रकानुसार ख्रिस्तिना पृथ्वीच्या कक्षेत फेब्रुवारी २०२०पर्यंत राहणार आहे. यापूर्वी २०१६-१७मध्ये पेगी व्हिटसन या महिला अंतराळवीराने सलग २८८ दिवस अंतराळात वास्तव्य केले होते. ख्रिस्तिना हा विक्रम मोडणार आहे.
आपल्या अंतराळ वास्तव्यात ख्रिस्तिना नासाच्या ५९, ६० व ६१ या तीन अंतराळ मोहिमांमध्ये सहभागी होईल. यामुळे नासाच्या ह्युमन रिसर्च उपक्रमाला आणखी माहिती मिळेल. यामुळे नासाच्या भावी काळातील चांद्र व मंगळमोहिमांना मदत मिळणार आहे. ही माहिती ह्युस्टन येथील नासाच्या जॉनसन स्पेस सेंटरमधील मुख्य शास्त्रज्ञ जेनिफर फोगार्टी यांनी दिली आहे.