‘बेल्ट ॲण्ड रोड इनिशिएटीव्ह’परिषदेसाठी उत्तर कोरियाला निमंत्रण
   दिनांक :20-Apr-2019
बीजिंग ,
चीनने वादग्रस्त 'बेल्ट ॲण्ड रोड इनिशिएटीव्ह' परिषदेसाठी उत्तर कोरियासह ३७ देशांच्या प्रतिनिधींना निमंत्रण पाठिविले आहे. २५-२७ एप्रिल रोजी ही परिषद होणार आहे. मोठी आर्थिक गुंतवणूक असलेला हा व्यापारी प्रकल्प वादग्रस्त ठरला आहे.
 
 
चीनचे अध्यक्ष शी-जिनपिंग यांचा हा महत्त्वकांक्षी प्रकल्प असून, एक लाख कोटी डॉलर इतकी मोठी गुंतवणूक असलेला हा प्रकल्प रस्ते, रेल्वे आणि समुद्रमार्गाने आशिया, आफ्रिका आणि युरोपला जोडणार आहे. दरम्यान, युरोप आणि अमेरिकेने या प्रकल्पाला 'निरर्थक प्रकल्प' म्हणून विरोध केला आहे. पण, प्रकल्पात सहभागी होणाऱ्या देशांची संख्या वाढत आहे. जी-७ संघटनेतील इटली हा पहिला देश या प्रकल्पात सहभागी झाला आहे. त्याशिवाय ३७ देशांच्या प्रतिनिधींना २५-२७ एप्रिल रोजी होणाऱ्या परिषदेसाठी निमंत्रणे पाठविण्यात आली आहेत, अशी माहिती परराष्ट्र मंत्री वाग यी यांनी दिली आहे. आग्नेय आशिया, पूर्व युरोप आणि सोव्हिएत समुहातील अनेक देशांना निमंत्रणे पाठविण्यात आली आहेत.
दरम्यान, अमेरिकेने या परिषदेसाठी आम्ही शिष्ठमंडळ पाठविणार नसल्याचे म्हटले आहे. उत्तर कोरिया आपले शिष्ठमंडळ या परिषदेसाठी पाठविणार आहे. चीनचे हे 'कर्जाचे जाळे' असल्याची टीका युरोपीय देशांनी केली आहे.