भारतासोबत अनौपचारिक बैठकीसाठी चीन तयार
   दिनांक :20-Apr-2019
बीजिंग,
'बीआरआय'बाबत भारताशी मतभेद असले तरी संबंध सुधारण्यासाठी भारताबरोबर 'वुहान'सारखी बैठक घेण्यास तयार असल्याचे चीनने म्हटले आहे. चीन पाकिस्तान इकॉनॉमिक कॉरिडॉरला भारताने विरोध करू नये, जम्मू-काश्मीरच्या भारताच्या मूलभूत भूमिकेच्या चीन आड येण्याचा प्रश्नच येत नाही, असे चीनचे परराष्ट्रमंत्री वांग यी यांनी म्हटले आहे.

 
पंतप्रधान नरेंद्र मोदी आणि चीनचे अध्यक्ष शी जिनपिंग यांच्यात वुहान येथे झालेल्या बैठकीनंतर दोन्ही देशांत जे सुधारणेचे वातावरण निर्माण झाले आहे त्यावर भारताच्या 'बीआरआय'विरोधामुळे परिणाम होणार नाही का, असे विचारले असता वांग म्हणाले, की या बैठकीनंतर दोन्ही देशाच्या नेतृत्वामध्ये परस्परांबद्दल विश्वास निर्माण झाला आहे. चीन-भारत संबंधात सुधारणा करण्यासाठी भविष्यातील योजनांचे नियोजनही त्यांनी केले आहे. वुहान बैठकीनंतर दोन्ही देशांनी संबंधांमध्ये मोठी प्रगती केली आहे. आम्ही आता पुढील बैठकीची तयारी करीत आहोत.' या बैठकीचा अधिक तपशील त्यांनी दिला नाही. भारत व चीनदरम्यान दुसरी अनौपचारिक बैठक भारतातील निवडणुका संपल्यानंतर भारतात होणार आहे.