मुंबई विमानतळावरून प्रवास करणाऱ्यांसाठी महत्वाची सूचना !
   दिनांक :20-Apr-2019
 
 
मुंबई : तुम्ही जर छत्रपती शिवाजी महाराज आंतरराष्ट्रीय विमानतळाच्या डॉमेस्टिक टर्मिनलवरून प्रवासाला जात असाल तर, तुमच्यासाठी महत्वाची सूचना आहे. गर्दी आणि मोठ्या रांगेमुळे विमान चुकण्याची शक्यता लक्षात घेता विमानतळावर किमान दोन तास आधी पोहचावे लागेल. या टर्मिनलवरील प्रवाशांची संख्या जवळपास ३० हजारांनी वाढली आहे.
 
 
 
 
 
मुंबई विमानतळावरील टर्मिनल १ वरून इंडिगो, गो एअर, स्पाइसजेट, ट्रू जेट यासारख्या देशांतर्गत सेवा देणाऱ्या कंपन्यांची विमाने सुटतात. तर टर्मिनल २ वरून एअर इंडिया, विस्तारा या देशी कंपन्यांसह सर्व परदेशी कंपन्यांच्या विमानांचा समावेश आहे. तसेच जेट एअरवेजची विमानेही टर्मिनल २ वरून सुटत होती. पण त्यांची उड्डाणे रद्द झाल्यानंतर प्रवाशी आता टर्मिनल १ कडे गर्दी करीत आहेत.
जेट एअरवेजच्या मुंबईहून दररोज १५२ सेवा होत्या. त्यापैकी जवळपास १२५ सेवा देशांतर्गत होत्या. त्यासाठी कंपनी १८० ते ३०० आसनी विमान वापरत होती. त्यानुसार दररोज २९ हजार ते ३१ हजार प्रवासी जेटद्वारे उड्डाण घेत होते. या सर्व प्रवाशांनी आता डॉमेस्टिक टर्मिनलवरून सुटणाऱ्या कंपन्यांना प्राधान्य दिले आहे. यामुळे या टर्मिनलमध्ये प्रवाशांना मोठ्या रांगेचा सामना करावा लागत आहे.
टर्मिनल १ हे टर्मिनल २ पेक्षा आकाराने लहान आहे. त्यामुळे येथे एरव्ही गर्दी असतेच. पण आता अचानक ३० हजार प्रवासी वाढल्याने प्रवाशांच्या रांगा वाढल्या आहेत. सुरक्षा रक्षकांना तिकीट व ओळखपत्र दाखवून टर्मिनल इमारतीत प्रवेश करण्यासाठी आधी साधारण ५ मिनिटे लागत होती. पण आता ही रांग ३० ते ४० प्रवाशांपर्यंत वाढल्याने त्यासाठी १० ते १२ मिनिटे लागत आहेत. यानंतर विमानसेवा कंपनीच्या काऊंटरवर सामानाचे चेक इन करून बोर्डिंग पास घेण्यासाठी पुन्हा २० ते २५ मिनिटे, तेथून वैयक्तिक तपासणीसाठीची रांग पुन्हा किमान २० मिनिटांची आहे. विमानाचे बोर्डिंग दरवाजे २० मिनिटे आधी बंद होतात. त्यानुसार आता डॉमेस्टिक टर्मिनलवरून प्रवासाला जायचे असल्यास विमान सुटण्याच्या किमान दोन तास आधी पोहोचणे आवश्यक झाले आहे.