श्रीलंकेत बॉम्बस्फोट मालिका कायम - बॉम्ब निकामी करताना झाला स्फोट
   दिनांक :22-Apr-2019
कोलंबो,
आठ साखळी बॉम्बस्फोटांनी श्रीलंका हादरलेली असतानाच आज पुन्हा श्रीलंकेत आणखी एक स्फोट झाला. कोलंबोतील एका चर्च जवळील बॉम्ब निकामी करताना हा स्फोट झाला असून त्यात कोणतीही जीवितहानी झाली नाही. दरम्यान, कोलंबोच्या मुख्य बस स्थानकावर ८७ डेटोनेटर्स सापडल्याने श्रीलंकेत खळबळ उडाली आहे.
 
 
आज सकाळी कोलंबोच्या विमानतळावरूनही एक बॉम्ब ताब्यात घेण्यात आला. त्यानंतर येथील एका चर्चजवळील गाडीमध्ये बॉम्ब असल्याची खबर मिळाल्यानंतर बॉम्बविरोधी पथकाने घटनास्थळी धाव घेऊन बॉम्ब निकामी करण्यास सुरुवात केली असता त्याचा जोरदार स्फोट झाला. सुदैवाने या दुर्घटनेत कोणतीही जीवितहानी झाली नाही. बॉम्बचा स्फोट होताच या गाडीचा चक्काचूर झाला आणि गाडीने पेट घेतला. त्यामुळे या परिसरातील लोकांमध्ये घबराट पसरली होती.
श्रीलंकेतील पेट्टा परिसरातील सेंट्रल कोलंबो स्टेशनवर मोठ्या संख्यने डेटोनेटर्स सापडले आहेत. सुरवातीला १२ डेटोनेटर्स बॉम्ब सापडले. त्यानंतर आणखी शोध घेतला असता ७२ डेटोनेटर्स सापडले. त्यामुळे स्थानिकांमध्ये भीतीचं वातावरण निर्माण झालं असून श्रीलंकन नागरिक भयभीत झाले आहेत. बॉम्बच्या दहशतीमुळे अनेक लोक घराबाहेर पडण्यासही घाबरत असल्याने येथील जनजवीन ठप्प झालं आहे. दरम्यान, श्रीलंकन पोलिसांनी काल दिवसभरापासूनच कोलंबोच्या प्रत्येक भागात सर्च ऑपरेशन सुरू केलं असून संशयास्पद वस्तू ताब्यात घेण्यास सुरुवात केली आहे. रविवारी श्रीलंकेत झालेल्या आठ साखळी बॉम्बस्फोट प्रकरणी आतापर्यंत २४ लोकांना अटक करण्यात आली आहे.
- श्रीलंकेत आतापर्यंत एकूण ९ बॉम्बस्फोट झाले आहेत

- या स्फोटांमध्ये आतापर्यंत २९० लोक ठार झाले असून ४५० जण जखमी झाले आहेत

- मृतांमध्ये चार भारतीयांचा समावेश. मृतांमध्ये पोलंड, डेन्मार्क, चीन, जपान, पाकिस्तान, अमेरिका, मोरक्को आणि बांग्लादेशातील नागरिकांचाही समावेश आहे.

- आज मध्यरात्रीपासून श्रीलंकेत आणीबाणी लागू होणार

- अफवा रोखण्यासाठी सोशल मीडियावर बंदी