ख्राइस्टचर्च हल्ल्याचा बदला घेण्यासाठीच श्रीलंकेत बॉम्बस्फोट
   दिनांक :23-Apr-2019
श्रीलंका,
'ईस्टर संडे'च्या पवित्र दिवशी श्रीलंकेत झालेले बॉम्बस्फोट हे न्यूझीलंडमधील ख्राइस्टचर्च येथे झालेल्या हल्ल्याचा बदला घेण्यासाठी करण्यात आल्याची खळबळजनक माहिती समोर आली आहे. यामुळे जगात नव्याने धर्मयुद्ध होते की काय अशी चर्चा धार्मिक वर्तुळांमध्ये सुरू आहे.
 
 
श्रीलंकेत रविवारी चर्चमध्ये आठ बॉम्बस्फोट झाले. या बॉम्बस्फोटांमध्ये ३००हून अधिक ठार झाले आहे तर ५०० जण जखमी झाले आहेत. कोणत्याही दहशतवादी संघटनेने या बॉम्बस्फोटाची जबाबदारी अद्याप स्वीकारलेली नाही. ख्राइस्टचर्च येथील मशीदींवरील हल्ल्याचा बदला घेण्यासाठीच हे बॉम्बस्फोट घडवून आणण्यात आले अशी माहिती संरक्षण खात्याचे राज्यमंत्री रुवान विजयवर्धने यांनी दिली श्रीलंकेच्या संसदेत दिली आहे.
 
न्यूझीलंडमधील ख्राइस्टचर्च शहरातील दोन मशिदींमध्ये १५ मार्चला एका माथेफिरूने बेछूट गोळीबार केला होता. या गोळीबारात ५० जण मृत्यूमुखी पडले होते. मुसलमानांचा पृथ्वीवरून समूळ नायनाट करण्यासाठी आपण हे कृत्य केलं अशी माहिती हल्लेखोराने दिली होती. हा हल्लेखोर ख्रिस्ती होता.
 
हेच लक्षात घेऊन ईस्टरच्या सन्डेच्या पवित्र दिवशी श्रीलंकेतील चर्चंमध्ये बॉम्बस्फोट घडवण्यात आले आहेत. दरम्यान आज श्रीलंकेत मृतांवर सामुहीक अंत्यसंस्कार करण्यात आले . मृतांना श्रद्धांजली देण्यासाठी देशभरात श्रीलंकेचा झेंडाही अर्ध्यापर्यंत खाली आणण्यात आला होता. या हल्ल्याचा जगभरातून निषेध करण्यात आला असून या हल्ल्याच्या सूत्रधारांचा शोध सुरू आहे.