ऑफिसमधील लैंगिक अत्याचाराच्या तक्रारीसाठी गुगलची नवी वेबसाइट
   दिनांक :27-Apr-2019
कामाच्या ठिकाणी होणाऱ्या लैंगिक शोषणाच्या प्रकारांना आळा घालण्यासाठी गुगलनं विशेष पाऊल उचललं आहे. लैंगिक शोषणाचा प्रयत्न झाल्यास त्याची तक्रार वेळीच व जलद करता यावी यासाठी गुगलनं एक वेबसाइटच तयार केली आहे. पीडित कर्मचाऱ्यांना त्यावर चटकन तक्रार करता येणार असून त्याची तातडीनं दखलही घेतली जाणार आहे.
 
 
लैंगिक अत्याचारांमुळे गेल्या वर्षी गुगलच्या जवळपास २० हजार कर्मचाऱ्यांनी राजीनामा दिला होता. गुगलनं याची गंभीर दखल घेऊन यावर उपाय शोधायला सुरुवात केली होती. त्यातूनच ही वेबसाइट बनवण्यात आली आहे. 'डायवर्सिटी, इक्विटी अॅन्ड इनक्लुजन'च्या जागतिक संचालक मिलोनी पार्कर यांनी गुरुवारी, २४ एप्रिलला या विषयीची माहिती आपल्या ब्लॉगवरून दिली.
'अनेक तांत्रिक बाबींचा अभ्यास करून व त्यांचा मेळ घालून आम्ही ही सोपी वेबसाइट तयार केली आहे. कर्मचाऱ्यांना तक्रार करणे सोयीचे जावे हा यामागचा हेतू आहे,' असं पार्कर यांनी म्हटलं आहे. 'गुगलमध्ये काम करणाऱ्या प्रत्येक माणसाला प्रतिष्ठा आणि सन्मान मिळालाच पाहिजे' असंही त्या पुढे म्हणाल्या. 'या वेबसाइटमुळं लैंगिक अत्याचारांच्या प्रकरणांतील मध्यस्थांचा हस्तक्षेप पूर्णपणे बंद होणार आहे. तसंच, पीडितांना ही प्रकरणं सरळ न्यायालयात घेऊन जाता येणार आहेत,' असा विश्वास गुगलचे सीईओ सुंदर पिचाई यांनी व्यक्त केला.